ডিজিটেল ডেস্কঃ ইষ্টানবুলৰ মেয়ৰ তথা তুৰস্কৰ ৰাষ্ট্ৰপতি ৰেচেপ টায়ীপ এডোগানৰ শীৰ্ষ প্রতিদ্বন্দ্বীক কাৰাৰুদ্ধ কৰা কাৰ্যই বৃদ্ধি কৰা প্ৰতিবাদ দমন কৰিবলৈ তুৰস্কৰ চৰকাৰে কেইবাজনো সাংবাদিকক ঘৰৰ পৰাই আটক কৰে। সোমবাৰে এটা সংবাদ মাধ্যম কর্মী সংস্থাই এই কথা জনায়।
নিষ্পত্তি নোহোৱা দুৰ্নীতিৰ অভিযোগৰ এটা গোচৰত দেওবাৰে এখন আদালতে আনুষ্ঠানিকভাৱে মেয়ৰ একৰেম ইমামগলুক গ্ৰেপ্তাৰ কৰে আৰু তেওঁক কাৰাৰুদ্ধ কৰাৰ নিৰ্দেশ দিয়ে। উল্লেখযোগ্য যে বুধবাৰে ইষ্টানবুলৰ মেয়ৰজনক গ্ৰেপ্তাৰ কৰাৰ পাছত তুৰস্কৰ ৰাজপথত যি ধর্ণা প্রদর্শন হয়, তেনে ধর্ণা দেশখনত এটা দশকতকৈও অধিক কাল দেখিবলৈ পোৱা হোৱা নাছিল।
এনে প্রতিবাদে গণতন্ত্র আৰু আইনৰ শাসনৰ বিষয়ে উদ্বেগ বৃদ্ধি কৰিছে। প্রতিবাদ বৃদ্ধি পোৱাৰ বাবেই চৰকাৰে কমেও ৮জন সাংবাদিক আৰু ফটো সাংবাদিকক আটক কৰি 'সংবাদ মাধ্যমৰ স্বাধীনতা তথা সত্য জনাৰ জনতাৰ অধিকাৰত আক্ৰমণ কৰিছে' বুলি ডিস্ক-বাচিন-ইজ নামৰ সংস্থাটোৱে অভিযোগ কৰে। সংস্থাটোৱে সামাজিক মাধ্যম এক্সত উক্ত সাংবাদিকসকলক তৎক্ষণাৎ মুক্তি দিবলৈ দাবী জনাই চৰকাৰক কয়, 'আপোনালোকে সাংবাদিকৰ কণ্ঠ ৰুদ্ধ কৰি সত্যক লুকুৱাব নোৱাৰিব।'
উল্লেখযোগ্য যে মেয়ৰজনক তেওঁৰ ঘৰৰ পৰা গ্ৰেপ্তাৰ কৰাৰ দিনাৰ পৰা (১৯ মার্চ) আৰক্ষীয়ে মুঠ ১,৩৩৩জন লোকক আটক কৰিছে। গৃহ মন্ত্রী আলী য়েৰলিকায়াই এই কথা জনায়। আনহাতে, এই সময়ছোৱাত হোৱা প্ৰতিবাদী কাৰ্যসূচীত আৰক্ষীৰ ১২৩জন লোক আহত হৈছে বুলি জনায় মন্ত্রীজনে কয় যে এচিড, অগ্নিবোমা আৰু ছুৰীৰ দৰে বিপজ্জনক সামগ্রীও আৰক্ষীয়ে জব্দ কৰিছে।
উৎসঃ দৈনিক জনমভূমি
Continue Reading
