ডিজিটেল ডেস্কঃ মোগলৰ দিনৰে পৰাই ভাৰতত জনপ্ৰিয় হৈ পৰা এবিধ খাদ্য হৈছে বিৰিয়ানী। দেশৰ বিভিন্ন প্ৰান্তৰ লগতে অসমতো এতিয়া বহু মানুহৰ মাজত জনপ্ৰিয় হৈ পৰিছে এই সু-স্বাদু খাদ্য বিধ। অসমত জনপ্ৰিয় হোৱাৰ আগতেই বিৰিয়ানী জনপ্ৰিয় খাদ্য হিচাবে পৰিগণিত হৈছিল বংগত।
১৮৫৬ চনত নৱাব ৱাজিদ আলী শ্বাহ কলকাতালৈ অহাৰ পিছতহে চহৰখনত বিৰিয়ানীৰ যাত্ৰা আৰম্ভ হৈছিল। মোগলৰ খাদ্য সম্ভাৰৰ জুতি লোৱাসকলে কলকাতা চহৰত বিৰিয়ানীৰ সোৱাদ আৰু গোন্ধৰ সৈতেও পৰিচিত হৈ পৰিছিল।
বিৰিয়ানীৰ আলুৰ চোববাবলৈ কিমান মজা সেয়া খাওতাইহে বুজি পায়।এতিয়া নৱ প্ৰজন্মৰ বহুতৰে মাজতে হায়দৰাবাদী বিৰিয়ানীৰ পৰা আৰম্ভ কৰি নানান প্ৰকাৰৰ বিৰিয়ানীৰ প্ৰতি থকা প্ৰেম কাৰো বাবে অজ্ঞাত নহয়। দেশৰ প্ৰায় ভাগ চহৰৰে আলিৰ দাঁতিত এতিয়া বিৰিয়ানী দোকান ভৰি পৰিছে ।
দোকানৰ পৰা প্ৰায় এশ মিটাৰ দূৰৈৰ পৰা বতাহত ভাঁহি আহে বিৰিয়ানীৰ মলমলীয়া গোন্ধ! প্ৰায়ভাগ চহৰৰে পথৰ দাঁতিত দূৰৰ পৰাই আপুনি ৰঙা কাপোৰৰে মেৰিয়াই থোৱা বিৰিয়ানীৰ ডাঙৰ পাত্ৰ দেখা পাব পাৰে। সেই ৰঙা কাপোৰেৰে আবৰি ৰখা পাত্ৰই যেন গ্ৰাহকক টানি লৈ যায়। আপুনি হয়তো মন কৰিছে যে বজাৰত বিক্ৰীৰ বাবে ৰখা বিৰিয়ানীৰ পাত্ৰ বোৰ ৰঙা কাপোৰেৰে ঢাকি ৰখা হয়।
মটনেই হওঁক বা মুৰ্গী মাংসৰেই হওঁক- যিকোনো বিৰিয়ানীৰেই পাত্ৰ প্ৰায় সকলো দোকানতে ৰঙা কাপোৰেৰে মেৰিয়াই থোৱা তাকে। কিন্তু কিয় ৰঙা কাপোৰেৰে মেৰিয়াই ৰখা হয় বিৰিয়ানীৰ পাত্ৰ? বুৰঞ্জীৰ তথ্য অনুসৰি সম্ৰাট হুমায়ুনৰ খাদ্য পৰিৱেশন কৰাৰ 'দৰবাৰী ৰীতি' অনুসৰি যদি খাদ্য ৰূপৰ পাত্ৰত পৰিৱেশন কৰা হৈছিল তেন্তে তেনে পাত্ৰ ৰঙা কাপোৰেৰে ঢাকি ৰখা হৈছিল ।
আনহাতে ৰূপৰ সলনি আন ধাতু বা পোৰ্চেলিনৰ বাচন-বৰ্তন বগা কাপোৰেৰে ঢাকি ৰখা হৈছিল। ধাতু অনুসৰি বিভিন্ন ৰঙৰ কাপোৰেৰে ঢাকি ৰখা পাত্ৰৰ পৰাই অতিথিসকলক খাদ্য পৰিৱেশন কৰা হৈছিল। সম্ৰাট হুমায়ুনৰ দিনৰে পৰাই খাদ্য পৰিবেশনৰ এনে নিয়ম মানি চলা হৈছে। পিছত, মোগল আদালতেওঁ এই প্ৰথাক স্বীকৃতি দিছিল। খাদ্য ৰখা পাত্ৰ কি ৰঙৰ কাপোৰেৰে মেৰিয়াই ৰাখিব সেই ৰীতিটো লক্ষ্ণৌৰ নৱাবসকলেও পিছলৈ অনুসৰণ কৰিবলৈ লৈছিল।
বহুতে ধাৰণা কৰে যে বিৰিয়ানী যিহেতু মোগলৰ খাদ্য সম্ভাৰ, সেয়ে তেতিয়াৰে পৰাই বিৰিয়ানী ৰখা পাত্ৰ ৰঙা কাপোৰেৰে ঢাকি ৰখাৰ নিয়ম প্ৰচলিত হৈ আহিছে। যি পৰম্পৰা আজিও চলি আছে। আন বহুতে আকৌ ভাবে যে গ্ৰাহকৰ মনোযোগ আকৰ্ষণ কৰিবলৈয়েই বিৰিয়ানী ৰখা পাত্ৰ ৰঙা কাপোৰেৰে ঢাকি ৰখা হয়। কাৰণ ৰঙা ৰংটোৱে বহু দূৰৰ পৰাই মানুহৰ দৃষ্টি আকৰ্ষণ কৰিব পাৰে।
কাৰণ যিয়েই নহওঁক, ৰঙা কাপোৰেৰে ঢাকি ৰখা বিৰিয়ানীৰ পাত্ৰই অৱশ্যে সকলোকে সু-স্বাদু আহাৰ বিধৰ কথা মনত পেলাই দিয়ে, জিঙা ওপচাই পেলায় পানীৰে।
Continue Reading
