বঙাইগাঁও মাদ্ৰাছাৰ যৌন নিৰ্যাতন কাণ্ড: মূল অভিযুক্তসহ তিনিজন গ্ৰেপ্তাৰ

বঙাইগাঁও জিলাৰ যোগীঘোপা অঞ্চলৰ মালেগাওঁস্থিত ইছাতুল উলুম মাদ্ৰাছাতুল বানাত নামৰ ব্যক্তিগত আৱাসিক ছোৱালী মাদ্ৰাছাখনত ছাত্ৰীসকলক যৌন নিৰ্যাতন চলোৱাৰ অভিযোগত আৰক্ষীয়ে মূল অভিযুক্তসহ তিনিজনক গ্ৰেপ্তাৰ কৰিছে। এই ঘটনা সন্দৰ্ভত সৃষ্টি হোৱা ব্যাপক উত্তেজনা আৰু প্ৰতিবাদৰ পিছতে আৰক্ষীয়ে এই লোকসকলক আটক কৰে।

আৰক্ষীৰ সূত্ৰে প্ৰকাশ যে, এই ঘটনাৰ মূল অভিযুক্ত আমিনুল ইছলামক শুকুৰবাৰে ডুমুৰীয়াৰ পৰা গ্ৰেপ্তাৰ কৰা হৈছে। ইয়াৰ উপৰিও, মাদ্ৰাছাখনৰ দুজন ন্যাসৰক্ষী সদস্য তথা শিক্ষক ক্ৰমে আব্দুল জব্বাৰ আৰু হজৰত আলীকো আৰক্ষীয়ে আটক কৰিছে। আব্দুল জব্বাৰক টিংকুনীয়াৰ পৰা আৰু হজৰত আলীক পিৰাধৰাৰ পৰা গ্ৰেপ্তাৰ কৰা হয়। এই চাৰিজন অভিযুক্তৰ বিৰুদ্ধে যোগীঘোপা আৰক্ষী থানাত ১০৯/২০২৬ নম্বৰৰ এটা গোচৰ ৰুজু কৰা হৈছে বুলি আৰক্ষীয়ে নিশ্চিত কৰিছে।

উল্লেখযোগ্য যে, যোৱা কেইদিনমানৰ পূৰ্বে ইছাতুল উলুম মাদ্ৰাছাতুল বানাত নামৰ এই মাদ্ৰাছাখনৰ এজন শিক্ষকে কেইবাগৰাকীও ছাত্ৰীক যৌন নিৰ্যাতন চলোৱাৰ অভিযোগ উত্থাপন হৈছিল। এই অভিযোগ পোহৰলৈ অহাৰ লগে লগে স্থানীয় ৰাইজ আৰু অভিভাৱকসকলৰ মাজত তীব্ৰ ক্ষোভৰ সৃষ্টি হয়। ক্ষুব্ধ অভিভাৱকসকলে যোগীঘোপা আৰক্ষী থানাত এজাহাৰ দাখিল কৰাৰ লগতে ৰাইজে মাদ্ৰাছাখনৰ চৌহদৰ একাংশ ভাঙি পেলায়। পৰিস্থিতি নিয়ন্ত্ৰণলৈ আনিবলৈ আৰক্ষীয়ে হস্তক্ষেপ কৰিবলগীয়া হৈছিল আৰু তাৰ পিছতে প্ৰশাসনৰ দ্বাৰা মাদ্ৰাছাখনত ছীল মোহৰ লগোৱা হৈছিল। এই গ্ৰেপ্তাৰে ঘটনাৰ তদন্তত এক গুৰুত্বপূৰ্ণ অগ্ৰগতি সূচনা কৰিছে।