ডিজিটেল ডেস্কঃ ছৌদি আৰৱ নিজৰ কঠোৰ আইনৰ বাবে প্ৰায়ে আলোচনাৰ বিষয় হৈয়েই থাকে। এইবাৰ অন্যতম, এই দেশখনে ২০২৪ চনত ১০১জন বিদেশীক মৃত্যুদণ্ডৰ নিৰ্দেশ জাৰি কৰিছে। এই সংখ্যা দেশৰ ইতিহাসত এবছৰত দিয়া সৰ্বাধিক মৃত্যুদণ্ড। কেৱল এয়াই নহয়, ২০২৩ আৰু ২০২২ চনত নিহত বিদেশীৰ সংখ্যাতকৈ এই সংখ্যা প্ৰায় তিনিগুণ বেছি । এনে বাতৰিৰ পাছত মানৱ অধিকাৰ সংগঠনসমূহেও দেশখনক মৃত্যুদণ্ডৰ অপব্যৱহাৰ কৰাৰ অভিযোগ উত্থাপন কৰিছে৷
চলিত বৰ্ষত ফাঁচী দিয়া বিদেশীসকলৰ ভিতৰত আছে পাকিস্তানৰ ২১ জন, য়েমেনৰ ২০ জন, ছিৰিয়াৰ ১৪ জন, নাইজেৰিয়াৰ ১০ জন, ইজিপ্তৰ ৯ জন, জৰ্ডানৰ ৮ জন আৰু ইথিওপিয়াৰ ৭ জন নাগৰিক। চুডান, ভাৰত আৰু আফগানিস্তানৰ তিনিজনকৈ আৰু শ্ৰীলংকা, ইৰিত্ৰিয়া আৰু ফিলিপাইনছৰ এজনকৈ লোককো ফাঁচী দিয়া হৈছে।
এক প্ৰতিবেদন অনুসৰি এই লোকসকলৰ বহুতকে ড্ৰাগছ সম্পৰ্কীয় অপৰাধৰ বাবে শাস্তি প্ৰদান কৰা হৈছে। এই বৰ্ষত ড্ৰাগছ অপৰাধৰ সৈতে জড়িত ৯২টা গোচৰৰ ভিতৰত ৬৯টা গোচৰত বিদেশী নাগৰিকক মৃত্যুদণ্ড দিয়া হৈছে। ইউৰোপীয়-ছৌদি অৰ্গেনাইজেচন ফৰ হিউমেন ৰাইটছৰ আইনী সঞ্চালক তাহা আল হাজ্জীয়ে এএফপিক জনায় যে, "বিদেশীসকল অজ্ঞাত। তেওঁলোক প্ৰায়ে বৃহৎ ড্ৰাগছ ব্যৱসায়ীৰ বলি হয় আৰু গ্ৰেপ্তাৰৰ পৰা ফাঁচীলৈকে দুৰ্ব্যৱহাৰৰ সন্মুখীন হয়।"
এম্নেষ্টী ইণ্টাৰনেশ্যনেলৰ দৰে আন্তঃৰাষ্ট্ৰীয় সংস্থাই ছৌদি আৰৱক বিশ্বৰ তৃতীয় বৃহত্তম দেশ হিচাপে কয়দীক ফাঁচী দিয়া দেশ বুলি অভিহিত কৰিছে। এই তালিকাত ছৌদি আৰৱতকৈ আগবাঢ়ি আছে চীন আৰু ইৰাণ। চলিত বৰ্ষত মৃত্যুদণ্ডৰ অধিক সংখ্যাই ছৌদি আৰৱৰ ক্ৰাউন প্ৰিন্স মহম্মদ বিন ছলমানৰ দাবীৰ বিপৰীত। ২০২২ চনৰ এক সাক্ষাৎকাৰত তেওঁ কয় যে হত্যা বা একাধিক লোকৰ জীৱনৰ প্ৰতি ভাবুকি কঢ়িয়াই অনা গোচৰৰ বাহিৰে দেশখনে মৃত্যুদণ্ড বিলুপ্ত কৰিছে।
Continue Reading
