ডিজিটেল ডেস্ক: বৃহস্পতিবাৰে পুৱা পুৰণি দিল্লীৰ চাওড়ী বজাৰৰ সমীপৱৰ্তী পাইলান এলেকাত এটা শোকাৱহ দুৰ্ঘটনা সংঘটিত হয়। পুৱা প্ৰায় ১০:১৫ বজাত চাওড়ী বজাৰ মেট্ৰ’ ষ্টেচনৰ ঠিক সন্মুখত থকা শীশ মহলৰ গলি চত্তাৰাত এটা তিনি মহলীয়া নিৰ্মীয়মাণ অট্টালিকা হঠাতে খহি পৰে। দিল্লী আৰক্ষীয়ে প্ৰকাশ কৰা মতে, এই দুৰ্ঘটনাটোত দুজন লোকৰ মৃত্যু হৈছে আৰু আন এজন গুৰুতৰভাৱে আহত হৈছে।
দিল্লী অগ্নিসেৱা বাহিনীৰ বিষয়া সকলে জনোৱা মতে, খবৰ পোৱাৰ লগে লগে ঘটনাস্থলীলৈ ৬ টা জৰুৰীকালীন গোট প্ৰেৰণ কৰা হয়। ইয়াৰ ভিতৰত ৩ টা ৱাটাৰ টেণ্ডাৰ, ১ টা ৱাটাৰ বাউজাৰ, ১ টা দ্ৰুত প্ৰতিক্ৰিয়া বাহন (QRV) আৰু এটা দুৰ্ঘটনা প্ৰতিক্ৰিয়া দল (IRT) অন্তৰ্ভুক্ত আছে। বৰ্তমান জ্যেষ্ঠ বিষয়াৰ নেতৃত্বত ঘটনাস্থলীত উদ্ধাৰ অভিযান অব্যাহত আছে।
ঘটনাস্থলীত উপস্থিত থকা অগ্নিসেৱা বাহিনীৰ বিষয়া ডি কে ৰয়ে জনায় যে তিনি মহলীয়া নিৰ্মীয়মাণ অট্টালিকাটো সম্পূৰ্ণৰূপে খহি পৰাৰ ফলত এতিয়াও কেইজনমান লোক ভিতৰত আৱদ্ধ হৈ থকাৰ আশংকা কৰা হৈছে।
এই সন্দৰ্ভত তেওঁ অতিৰিক্ত কৰ্মী আৰু জ্যেষ্ঠ বিষয়াৰ সহায়ৰ বাবে অনুৰোধ জনাইছে। আনহাতে, আৰক্ষীয়ে ততাতৈয়াকৈ উদ্ধাৰ কৰি আহত ব্যক্তিজনক চিকিৎসালয়লৈ প্ৰেৰণ কৰে।
Continue Reading
