ডিজিটেল ডেস্ক: আজি বাক্সা জিলাৰ ২৩ সংখ্যক প্ৰতিষ্ঠা দিৱস। ঐতিহ্য, সাংস্কৃতিক বৈচিত্ৰ্য আৰু সম্প্ৰীতিৰ এনাজৰীৰে সমৃদ্ধ বাক্সাত উলহ-মালহেৰে জিলা দিৱস উদযাপন কৰা হৈছে। সমৃদ্ধ ঐতিহ্য, বৰ্ণিল সাংস্কৃতিক বৈচিত্ৰ্য আৰু সাতামপুৰুষীয়া সম্প্ৰীতিৰ এনাজৰীৰে বান্ধ খাই থকা বাক্সা জিলাই আজি গৌৰৱোজ্জ্বল যাত্ৰাৰ ২৩টা বছৰ সম্পূৰ্ণ কৰিলে। উন্নয়ন, শান্তি আৰু সমৃদ্ধিৰ দিশত ক্ৰমাৎ আগুৱাই যোৱা জিলাখনৰ ২৩ সংখ্যক প্ৰতিষ্ঠা দিৱস উপলক্ষে সমগ্ৰ জিলাখনতে সৃষ্টি হৈছে এক উৎসৱমুখৰ পৰিৱেশ।
উল্লেখ্য যে, ২০০৩ চনত বড়ো শান্তি চুক্তি তথা বিটিচি চুক্তি স্বাক্ষৰিত হোৱাৰ পাছতে বিটিচিৰ অন্তৰ্গত বাক্সা জিলাৰ গঠন প্ৰক্ৰিয়া আৰম্ভ হয়। পৰৱৰ্তী সময়ত জিলাখনে এক সুকীয়া পৰিচয় লাভ কৰি অসমৰ মানচিত্ৰত বিশেষ স্থান দখল কৰিবলৈ সক্ষম হয়। এই বিশেষ দিনটো উপলক্ষে মুছলপুৰ উচ্চতৰ মাধ্যমিক বিদ্যালয়ৰ খেলপথাৰত দিনজোৰা বৰ্ণাঢ্য কাৰ্যসূচীৰে উদযাপন কৰা হৈছে বাক্সা জিলা দিৱস। পুৱাৰ ভাগতে বৰ্ণিল শোভাযাত্ৰা আৰু পতাকা উত্তোলনেৰে আৰম্ভ হয় প্ৰতিষ্ঠা দিৱসৰ কাৰ্যসূচী। ইয়াৰ পাছতে বিভিন্ন কাৰ্যসূচীৰ মাজেৰে দিনটো উদযাপন কৰা হয়।
জিলা দিৱসৰ অনুষ্ঠানত উপস্থিত থাকে মানস বিধানসভা সমষ্টিৰ বিধায়ক থানেশ্বৰ বসুমতাৰী, বিটিচি চৰকাৰৰ পাৰিষদ ৰিদীপ কুমাৰ ডেকা আৰু জিলা আয়ুক্তকে ধৰি কেইবাগৰাকীও বিশিষ্ট ব্যক্তি। জিলাখনৰ বিভিন্ন প্ৰান্তৰ পৰা অহা অসংখ্য ৰাইজে এই উদযাপনত অংশগ্ৰহণ কৰি অনুষ্ঠানটোৰ সৌষ্ঠৱ বৃদ্ধি কৰিছে।
প্ৰতিষ্ঠা দিৱসক কেন্দ্ৰ কৰি এতিয়া উদুলি-মুদুলি হৈ পৰিছে মুছলপুৰ উচ্চতৰ মাধ্যমিক বিদ্যালয়ৰ খেলপথাৰৰ বাকৰি। জাতি-জনগোষ্ঠীৰ বৰ্ণিল সংস্কৃতি, ঐক্য, ভাতৃত্ববোধ আৰু সম্প্ৰীতিৰ এক সুন্দৰ নিদৰ্শন দাঙি ধৰিছে আজিৰ এই উদযাপনে।
২৩ বছৰৰ এই গৌৰৱময় যাত্ৰাই বাক্সা জিলাক আগন্তুক দিনবোৰত উন্নয়ন, শান্তি, ঐক্য আৰু সমৃদ্ধিৰ নতুন দিগন্তলৈ আগুৱাই নিয়ক—এয়াই প্ৰতিগৰাকী জিলাবাসীৰ আশা।
Continue Reading
