ডিজিটেল ডেস্ক: পবিত্ৰ শিক্ষকতা বৃত্তিত কালিমা সানি এইবাৰ আৰক্ষীৰ জালত পৰিল এজন প্ৰধান শিক্ষক। ধুবুৰীৰ ৩৩৩ নং ছহৰাবৰ চৰ এল পি স্কুলৰ প্ৰধান শিক্ষক শ্বাহজাহান হুছেইন শ্বেখ নামৰ শিক্ষকজনক এক গুৰুতৰ অভিযোগত গ্ৰেপ্তাৰ কৰিছে আৰক্ষীয়ে।
জানিব পৰা মতে, অভিযুক্ত প্ৰধান শিক্ষকজনে তেওঁৰ বিদ্যালয়ৰ কাষৰে এগৰাকী মহিলাৰ সৈতে বলপূৰ্বকভাৱে অবৈধ সম্পৰ্ক স্থাপন কৰাৰ চেষ্টা চলাইছিল। এই সন্দৰ্ভত ভুক্তভোগী মহিলাগৰাকীয়ে ধুবুৰীৰ এ এম কো ৰোড বজাৰ নগৰ আৰক্ষী চকীত এক এজাহাৰ দাখিল কৰে। মহিলাগৰাকীৰ এজাহাৰৰ ভিত্তিত আৰক্ষীয়ে ২৫৩/২০২৬ নম্বৰত এক গোচৰ পঞ্জীয়ন কৰি লম্পট শিক্ষক শ্বাহজাহান হুছেইন শ্বেখক গ্ৰেপ্তাৰ কৰে।
আৰক্ষীৰ জালত পৰা শিক্ষকজনৰ ঘৰ ঘৰ ধুবুৰীৰ কঁচুৱাৰ খাচ অঞ্চলত বুলি জানিব পৰা গৈছে।
ধুবুৰী আৰক্ষীয়ে আজি ধৃত শিক্ষকজনক ধুবুৰী আদালতত হাজিৰ কৰায়। এজন সমাজ গঢ়োতা শিক্ষকে চৰম নৈতিক স্খলনৰ পৰিচয় দি এনেদৰে আৰক্ষীৰ হাতত গ্ৰেপ্তাৰ হ’বলগীয়া হোৱা ঘটনাই সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে।
Continue Reading
