নাৰায়ণপুৰৰ ধলপুৰত শহুৰেকৰ ঘৰত হাতত চোকা দা লৈ জোঁৱায়েকৰ ভয়ংকৰ তাণ্ডৱ

ডিজিটেল ডেস্ক: নাৰায়ণপুৰৰ ধলপুৰত শহুৰেকৰ ঘৰত হাতত চোকা দা লৈ জোঁৱায়েকৰ ভয়ংকৰ তাণ্ডৱ। আদালতত গোচৰ তৰাৰ পৰিণতিত ক্ষুব্ধ হৈ জোঁৱায়েকে শহুৰেক, শাহুৱেক আৰু নিজ পত্নীক কাটিবলৈ উদ্যত হোৱাৰ অভিযোগ শহুৰেকৰ৷

ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে। ধলপুৰ আৰক্ষীয়ে ইতিমধ্যে ঘটনাস্থলীত উপস্থিত হৈ নিয়ন্ত্ৰণ কৰে পৰিস্থিতি। ধলপুৰ চুতীয়া গাঁৱৰ বাসিন্দা বোধেশ্বৰ খাতনিয়াৰৰ কন্যা বিউটি খাতনিয়াৰ ২০২০ চনত বিবাহপাশত আৱদ্ধ হৈছিল হাৱাজানৰ নৱজিৎ গোঁহাইৰ সৈতে। কিন্তু পাৰিবাৰিক কন্দলৰ বাবে বিগত দুমাহ ধৰি পিতৃগৃহত থকা বিউটিয়ে স্বামীৰ বিৰুদ্ধে গহপুৰ আদালতত এক গোচৰ ৰুজু কৰিছিল। ইয়াতে ক্ষুব্ধ হৈ পৰে স্বামী নৱজিৎ।

​

আজি দিনদুপৰতে প্ৰতিশোধৰ বাবে হাতত চোকা দা লৈ শহুৰেকৰ ঘৰত উপস্থিত হৈ পৰিয়ালটোক আক্ৰমণৰ চেষ্টা চলায় নৱজিতে। ঘৰৰ ভিতৰত হোৱা এই হুৱাদুৱাৰ মাজতে শহুৰেকৰ ওলোটা আক্ৰমণত জোঁৱায়েক নৱজিৎ নিজেই মূৰত আঘাতপ্ৰাপ্ত হয়। স্থানীয় লোকে খবৰ দিয়াত ধলপুৰ আৰক্ষীৰ দল এটাই ঘটনাস্থলীত উপস্থিত হৈ উন্মত্ত জোঁৱায়েক নৱজিৎ গোঁহাইক কৰায়ত্ত কৰে।

অৱশ্যে আন এক তথ্য অনুসৰি, পত্নীক আন যুৱকৰ সৈতে আপত্তিজনক অৱস্থাত দেখাৰ বাবেহে এনে পৰিস্থিতিৰ সৃষ্টি হোৱা বুলি দাবী কৰিছে অভিযুক্ত জোঁৱায়েক নৱজিতে।