ধুবুৰীৰ গৌৰীপুৰত টিপকাই নদীৰ ভয়ংকৰ ৰূপ: ২০টাতকৈ অধিক ঘৰ উটি গ'ল

গৌৰীপুৰ, ১৮ জুলাই: ধুবুৰী জিলাৰ গৌৰীপুৰত টিপকাই নদীৰ ভয়ংকৰ ৰূপ দেখা গৈছে। যোৱা কেইবাদিনো ধৰি অব্যাহত থকা ধাৰাবাহিক বৰষুণৰ ফলত নদীখনৰ জলপৃষ্ঠ অভূতপূৰ্বভাৱে বৃদ্ধি পোৱাত ২০টাতকৈ অধিক পৰিয়ালৰ ঘৰ নদীৰ বুকুত জাহ গৈছে। গৌৰীপুৰ বিধানসভা সমষ্টিৰ অন্তৰ্গত বাঘমাৰা আৰু বৰাইবাৰী অঞ্চলত এই পৰিস্থিতি অধিক ভয়াৱহ হৈ পৰিছে, য'ত নৈপৰীয়া লোকসকলে গভীৰ সংকটৰ সন্মুখীন হৈছে।

কেৱল ঘৰ-দুৱাৰেই নহয়, বিস্তৃত কৃষিভূমিও বানৰ কবলত পৰিছে। শ শ বিঘা কৃষিভূমি বানে বুৰাই পেলাইছে, বিশেষকৈ মৰাপাট খেতিয়কসকলৰ বাবে ই এক ডাঙৰ আঘাত। জীৱন নিৰ্বাহৰ বাবে কৃষিৰ ওপৰত নিৰ্ভৰশীল কৃষকসকলে ব্যাপক শস্যৰ ক্ষতিৰ সন্মুখীন হৈছে, যাৰ ফলত তেওঁলোকৰ ভৱিষ্যতক লৈ উদ্বেগ বৃদ্ধি পাইছে।

অঞ্চলটোৰ স্থানীয় লোকসকলে দীৰ্ঘদিন ধৰি নদীৰ গৰাখহনীয়াৰ সমস্যাৰ সৈতে যুঁজি আহিছে। পূৰ্বৰ চৰকাৰসমূহে গ্ৰহণ নকৰা উপযুক্ত গৰাখহনীয়া প্ৰতিৰোধী ব্যৱস্থাৰ অভাৱৰ বাবেই প্ৰতি বছৰে এনে পৰিস্থিতিৰ সৃষ্টি হৈ আহিছে বুলি তেওঁলোকে অভিযোগ কৰিছে। গৌৰীপুৰৰ কেইবাটাও ধৰ্মীয় প্ৰতিষ্ঠানলৈও বৰ্তমান গৰাখহনীয়াৰ ভাবুকি আহিছে। পৰিস্থিতিৰ প্ৰতি লক্ষ্য ৰাখি স্থানীয় ৰাইজে ৰাজ্য চৰকাৰক ততাতৈয়াকৈ পদক্ষেপ ল'বলৈ আহ্বান জনাইছে, অন্যথা পৰিস্থিতি অধিক শোচনীয় হোৱাৰ সম্ভাৱনা আছে বুলিও তেওঁলোকে মত প্ৰকাশ কৰিছে।