ডিব্ৰুগড়ত নতুন বিধানসভা ভৱন: ২০০ বিধায়কৰ আসনৰ পৰিকল্পনা, সমষ্টি বৃদ্ধিৰ ইংগিত

অসমত ভৱিষ্যতে বিধানসভা সমষ্টিৰ সংখ্যা বৃদ্ধি পাব পাৰে। এই ইংগিত দিছে অসম বিধানসভাৰ অধ্যক্ষ ৰঞ্জিত কুমাৰ দাসে। ডিব্ৰুগড়ত নিৰ্মাণ হৈ থকা নতুন বিধানসভা ভৱনৰ মাষ্টাৰ প্লেন পৰ্যালোচনা কৰাৰ পাছত অধ্যক্ষ দাসে এই ভৱনত ২০০ জন বিধায়কৰ বাবে আসনৰ ব্যৱস্থা ৰখাৰ কথা সদৰি কৰে। বৰ্তমান অসম বিধানসভাৰ সদস্য সংখ্যা ১২৬ জন।

অধ্যক্ষ দাসে স্পষ্ট কৰি দিয়ে যে এই বৰ্ধিত আসন ক্ষমতা ভৱিষ্যতৰ প্ৰতি লক্ষ্য ৰাখিয়েই কৰা হৈছে। তেওঁ কয়, "যদি ভৱিষ্যতে বিধানসভাৰ সদস্য সংখ্যা বৃদ্ধি পায়, তেন্তে নতুন ভৱনটোৱে কোনো ধৰণৰ গাঁথনিগত সালসলনি বা বিস্তাৰ অবিহনেই অতিৰিক্ত বিধায়কসকলক স্থান দিবলৈ সক্ষম হ'ব।" সোমবাৰে অধ্যক্ষগৰাকীয়ে খানিকাৰস্থিত নিৰ্মাণস্থল পৰিদৰ্শন কৰি এই মহত্বাকাংক্ষী প্ৰকল্পটোৰ অগ্ৰগতিৰ বুজ লয়।

কেৱল মূল বিধানসভা ভৱনতে নহয়, বিধায়কসকলৰ বাবে আৱাসিক ভৱন নিৰ্মাণৰ প্ৰাৰম্ভিক পৰিকল্পনাও পুনৰীক্ষণ কৰা হৈছে। প্ৰথমতে ১২৬ জন বিধায়কৰ বাবে আৱাসিক ইউনিটৰ পৰিকল্পনা আছিল যদিও, ভৱিষ্যতৰ প্ৰয়োজনীয়তাৰ প্ৰতি লক্ষ্য ৰাখি এতিয়া প্ৰায় ১৭৫ টা আৱাসিক ইউনিট নিৰ্মাণৰ কথা চৰকাৰে বিবেচনা কৰিছে।

উল্লেখ্য যে ডিব্ৰুগড়ক ৰাজ্যৰ দ্বিতীয় ৰাজধানী হিচাপে গঢ়ি তোলাৰ অসম চৰকাৰৰ পৰিকল্পনাৰ কেন্দ্ৰবিন্দু হৈছে এই নতুন বিধানসভা চৌহদ। এই বৃহৎ প্ৰকল্পৰ জৰিয়তে অঞ্চলটোৰ সামগ্ৰিক উন্নয়নৰ লগতে প্ৰশাসনিক কাম-কাজৰ বিকেন্দ্ৰীকৰণৰো লক্ষ্য স্থিৰ কৰা হৈছে।