গুৱাহাটী: অসমত বানে সংহাৰী ৰূপ ধাৰণ কৰাৰ মাজতে মঙলবাৰে শিৱসাগৰ জিলাত আন এজন লোকৰ মৃত্যু হোৱাত ৰাজ্যখনত বানজনিত মৃতকৰ সংখ্যা ১১লৈ বৃদ্ধি পাইছে। শিৱসাগৰৰ বেতবাৰী গাঁৱৰ অম্লান গগৈ নামৰ লোকজন পানী আনিবলৈ যোৱাৰ সময়ত বানৰ প্ৰবল সোঁতত উটি গৈছিল। ততাতৈয়াকৈ তেওঁক চিকিৎসালয়লৈ নিয়া হৈছিল যদিও চিকিৎসকে মৃত বুলি ঘোষণা কৰে। এই ঘটনাই জিলাখনত বানৰ ভয়াৱহতা পুনৰবাৰ প্ৰমাণ কৰিলে।
বৰ্তমানৰ বান পৰিস্থিতিত শিৱসাগৰ জিলা আটাইতকৈ বেছি ক্ষতিগ্ৰস্ত হৈছে। ৰাজ্যিক দুৰ্যোগ ব্যৱস্থাপনা কৰ্তৃপক্ষ (ASDMA)ৰ তথ্য অনুসৰি, কেৱল শিৱসাগৰ জিলাতে প্ৰায় ১.৫৮ লাখ লোক বানৰ কৱলত পৰিছে। দিখৌ নদী ইয়াৰ বিপদ সীমাৰ ওপৰেৰে প্ৰবাহিত হৈ থকাৰ ফলত জিলাখনৰ পৰিস্থিতি ক্ৰমাগতভাৱে অধিক ভয়াৱহ হৈ উঠিছে। বহু গাঁও আৰু চহৰ নতুনকৈ জলমগ্ন হৈছে।
সমগ্ৰ ৰাজ্যজুৰি বৰ্তমান ১১খন জিলাৰ ৩.১০ লাখৰো অধিক লোক বানৰ কৱলত পৰিছে। বানাক্ৰান্ত অঞ্চলসমূহ ভ্ৰমণ কৰি মঙলবাৰে ৰাইজৰ দলৰ নেতা তথা স্থানীয় বিধায়ক অখিল গগৈয়ে উদ্ধাৰ অভিযানত অংশগ্ৰহণ কৰে। নাওৰে কেইবাখনো জলমগ্ন গাঁও পৰিদৰ্শন কৰি তেওঁ বানাক্ৰান্ত পৰিয়ালসমূহৰ সৈতে মত বিনিময় কৰে। এই পৰিস্থিতিক ৰাজ্যৰ বাৰ্ষিক বানতকৈও পৃথক বুলি অভিহিত কৰি তেওঁ ইয়াক 'অভূতপূৰ্ব প্ৰাকৃতিক দুৰ্যোগ' বুলি আখ্যা দিয়ে। তেওঁ চৰকাৰক ততাতৈয়াকৈ সাহায্য আগবঢ়াবলৈ আহ্বান জনায়।
Continue Reading
