উপভোক্তাৰ পক্ষত ই-২০ পেট্র’ল বিষয়ক প্রথমটো গোচৰৰ ৰায়

ডিজিটেল ডেস্ক: ইথানল মিশ্রিত পেট্ৰলৰ পৰা হোৱা ক্ষতিৰ সন্দৰ্ভত দেশত পঞ্জীয়ন হোৱা প্ৰথমটো গোচৰত উপভোক্তাৰ পক্ষত গ'ল আদালতৰ ৰায়। ছট্টিশগড়ৰ ৰায়পুৰ জিলা উপভোক্তা বিবাদ নিষ্পত্তি আয়োগে বাহনৰ গৰাকীৰ পক্ষত ৰায়দান কৰে। অভিযোগকাৰীয়ে অভিযোগত উল্লেখ কৰিছিল যে তেওঁ ক্ৰয় কৰা ২০২৩ চনত নির্মিত মাৰুতি ছুজুকিৰ গ্ৰেণ্ড ভিটাৰা স্ট্রং হাইব্রিড জেটা প্লাছ বাহনখনত ই-২০ পেট্রল ভৰোৱাৰ পাছৰ পৰাই ইঞ্জিনৰ সমস্যাই দেখা দিছে। বাহনখনৰ কাৰ্যক্ষমতা দুৰ্বল হৈ পৰাৰ লগতে মাইলেজো হ্রাস পোৱা বুলি উল্লেখ কৰিছিল। 

ৰায়পুৰৰ উপভোক্তা আদালতে এই গোচৰৰ শুনানি গ্রহণ কৰি মাৰুতি ছুজুকি কোম্পানী আৰু উপভোক্তাজনে বাহন ক্ৰয় কৰা ডীলাৰটোক এই অক্ষম বাহনখনৰ স্থানত এখন নতুন বাহন অথবা ২০.৫০ লাখ টকা প্রদানৰ বাবে নির্দেশ দিয়ে। লগতে গোচৰ চলি থকা সময়ছোৱাত উপভোক্তাৰ মানসিক অশান্তি আৰু গোচৰৰ সকলো খৰচৰ ক্ষতিপূৰণ দিয়াৰ বাবেও নির্দেশ দিয়ে। 

উল্লেখযোগ্য যে কেন্দ্ৰীয় চৰকাৰে দেশত পেট্রলত ২০ শতাংশ ইথানল মিহলি কৰাৰ বাবে কিছুদিন পূৰ্বে সিদ্ধান্ত লৈছিল। চৰকাৰৰ এই সিদ্ধান্তৰ ফলত দেশৰ বিভিন্ন স্থানত উপভোক্তাৰ বহু বাহনত বিভিন্ন সমস্যাৰ সৃষ্টি হোৱাৰ তথ্য প্রকাশ পাইছে।

উৎস : দৈনিক জনমভূমি