গোসাঁইগাঁৱত আছাৰ জিলা সভাপতিৰ বাসগৃহ অগ্নিকাণ্ডত ভস্মীভূত; কোনো দুৰ্বৃত্ত জড়িত থকাৰ সন্দেহ

ডিজিটেল ডেস্ক: গোসাঁইগাঁও মহকুমাৰ বুঢ়াচাৰা গাঁৱত আছাৰ কোকৰাঝাৰ জিলা সভাপতি পাউল টুডুৰ বাসগৃহত অগ্নিকাণ্ড সংঘটিত হয়৷ দুৰ্বৃত্তই অগ্নিসংযোগ কৰাৰ সন্দেহ কৰিছে জিলা সভাপতিগৰাকী তথা পৰিয়ালবৰ্গই। 

ৰান্ধনী ঘৰত অগ্নিসংযোগ হৈ দপদপকৈ জ্বলি ৰান্ধনী ঘৰটো ভস্মীভূত হয়। ঘৰৰ ভিতৰত থকা পশুধন, তিনিটা ছাগলী আৰু প্ৰায় ২৫ টা মুৰ্গী জ্বলি ভস্মীভূত হয়। ধান আদিকে ধৰি বাচন-বৰ্তনসমূহো ভস্মীভূত হয়।

প্ৰায় ৯ লাখ টকাৰ সম্পত্তিৰ ক্ষতি সাধন হোৱা বুলি পৰিয়ালৰ লোকে দাবী কৰিছে। ক’ৰ পৰা আৰু কেনেদৰে অগ্নিসংযোগ হৈছে তাৰ কোনো স্পষ্ট সূত্ৰ পোৱা নাই যদিও, কোনো দুৰ্বৃত্তই অগ্নিসংযোগ কৰাৰ সন্দেহ প্ৰকাশ কৰিছে পৰিয়ালৰ লোকে।

ঘটনাস্থলীত গোসাঁইগাঁও আৰক্ষী উপস্থিত হৈ ঘটনাৰ বুজ লোৱাৰ লগতে তদন্ত আৰম্ভ কৰিছে। ইপিনে জিলা সভাপতি গৰাকীয়ে সন্দেহ কৰিছে যে নিৰ্বাচনত জাতীয় স্বাৰ্থত এগৰাকী প্ৰাৰ্থীক সমৰ্থন কৰাৰ বাবেই উক্ত ঘটনা সংঘটিত হৈছে।