গুৱাহাটী আৰু নৱী মুম্বাই বিমানবন্দৰলৈ বিশ্ব স্বীকৃতি: ইজৰাইলৰ আস্থা ভাৰতীয় কোম্পানীৰ ওপৰত

ভাৰতৰ বিমানক্ষেত্ৰৰ আন্তঃগাঁথনিয়ে বৰ্তমান বিশ্বজুৰি বিশেষ মনোযোগ লাভ কৰিছে। শেহতীয়াকাকৈ গুৱাহাটীৰ লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰ আৰু নিৰ্মীয়মাণ নৱী মুম্বাই আন্তঃৰাষ্ট্ৰীয় বিমানবন্দৰে 'প্ৰিক্স ভাৰ্ছাই'ৰ 'বিশ্বৰ আটাইতকৈ সুন্দৰ বিমানবন্দৰ ২০২৬'ৰ তালিকাত স্থান লাভ কৰিছে। এই মৰ্যাদাপূৰ্ণ বিশ্ব স্বীকৃতিয়ে কেৱল ভাৰতৰ স্থাপত্য কলাৰ উৎকৰ্ষতাকেই প্ৰতিফলিত কৰা নাই, বৰঞ্চ ই কূটনৈতিক মহলতো নতুন আশাৰ সঞ্চাৰ কৰিছে। ইজৰাইলত ভাৰতীয় কোম্পানীসমূহে অতি সোনকালে বিমানবন্দৰ নিৰ্মাণত অংশগ্ৰহণ কৰিব বুলি ইজৰাইলৰ ভাৰতস্থিত ৰাষ্ট্ৰদূত ৰেউৱেন আজাৰে আশা ব্যক্ত কৰিছে।

ভাৰতীয় দূতাবাসে ইজৰাইলত থকা নিজৰ এক্স (পূৰ্বে টুইটাৰ) হেণ্ডেলত এই বিশ্ব স্বীকৃতিৰ কথা প্ৰকাশ কৰিছিল। দূতাবাসৰ ফালৰ পৰা কোৱা হৈছিল, “ভাৰতে কেৱল বিমানবন্দৰেই নিৰ্মাণ কৰা নাই, বৰঞ্চ বিশ্বমানৰ কীৰ্তিস্তম্ভ নিৰ্মাণ কৰিছে।” এই পোষ্টৰ প্ৰতি সঁহাৰি জনাই ৰাষ্ট্ৰদূত আজাৰে মন্তব্য কৰে, “আশা কৰোঁ যে অতি সোনকালে ইজৰাইলতো ভাৰতীয় কোম্পানীয়ে বিমানবন্দৰ নিৰ্মাণ কৰা দেখিবলৈ পাম।” ৰাষ্ট্ৰদূতগৰাকীৰ এই মন্তব্যই আন্তঃৰাষ্ট্ৰীয় সহযোগিতাত ভাৰতৰ বৰ্ধিত সামৰ্থ্য আৰু বিমানক্ষেত্ৰৰ আন্তঃগাঁথনিৰ প্ৰতি থকা আস্থাৰ ইংগিত বহন কৰিছে।

প্ৰিক্স ভাৰ্ছাইৰ ফালৰ পৰা এই দুয়োটা বিমানবন্দৰক আধুনিক প্ৰযুক্তি, বহনক্ষম ডিজাইন আৰু স্থানীয় সংস্কৃতিৰ সংমিশ্ৰণৰ বাবে প্ৰশংসা কৰা হৈছে। ভাৰতে দ্ৰুতগতিত নিজৰ বিমানবন্দৰ উন্নয়নৰ গতি ত্বৰান্বিত কৰিছে, য'ত নতুন প্ৰকল্পসমূহে যাত্ৰীৰ অভিজ্ঞতা, পৰিৱেশগত বহনক্ষমতা আৰু সেউজ প্ৰযুক্তিৰ ওপৰত অধিক গুৰুত্ব দিছে। এই বিশ্ব স্বীকৃতিয়ে নিশ্চিতভাৱে ভাৰতৰ বিমানক্ষেত্ৰক গোলকীয় মানচিত্ৰত এক বিশেষ স্থান প্ৰদান কৰিছে আৰু ভৱিষ্যতে অধিক আন্তঃৰাষ্ট্ৰীয় সহযোগিতালৈ দুৱাৰ মুকলি কৰিছে।