ডিজিটেল ডেস্ক: গুৱাহাটী মহানগৰীত এতিয়া চিলনী চোৰৰ উপদ্ৰৱত অতিষ্ঠ হৈছে জনসাধাৰণ। গুৱাহাটীৰ ভৰলুমুখত সংঘটিত হৈছে এক অতি অদ্ভুত আৰু চাঞ্চল্যকৰ চুৰিকাণ্ড। এগৰাকী মহিলাৰ ডিঙিৰ পৰা সোণৰ চেইন কাঢ়ি নিয়াই নহয়, সেই চেইন বন্ধকত থৈ বেংকৰ পৰা ল’ন ল’লে এটা চিলনী চোৰে।
যোৱা শনিবাৰে ভৰলুমুখৰ দীনেশ গোস্বামী উৰণ সেতুৰ তলত এই ঘটনা সংঘটিত হয়। বাইকত অহা এটা চিলনী চোৰে এগৰাকী মহিলাৰ ডিঙিৰ পৰা সোণৰ চেইনডাল থপিয়াই লৈ যায়। কিন্তু ততাতৈয়াকৈ পলাই যাওঁতে চোৰটোৱে নিজৰ স্কুটীখন ঘটনাস্থলীতে এৰি থৈ যাবলৈ বাধ্য হয়।
সমগ্ৰ চুৰিকাণ্ডটো ওচৰৰে CCTV কেমেৰাত বন্দী হৈ ৰয়। ঘটনাৰ পাছতেই তদন্তত নমা ভৰলুমুখ আৰক্ষীয়ে চিলনী চোৰটোক গ্ৰেপ্তাৰ কৰে। ধৃত চোৰটোৰ নাম হীৰেন বৰুৱা। জেৰাৰ অন্তত চোৰটোৰ মুখৰ পৰা যি তথ্য পোহৰলৈ আহিল, সেয়া শুনি আৰক্ষীৰো চকু কপালত উঠিল!
মহিলাগৰাকীৰ পৰা চেইনডাল থপিয়াই নিয়াৰ পাছতেই হীৰেন বৰুৱা পোনে পোনে গৈছিল বেংকলৈ। চেণ্ট্ৰেল বেংক অৱ ইণ্ডিয়াৰ কুমাৰপাৰা শাখাত নিজৰ ব্যক্তিগত একাউণ্ট ব্যৱহাৰ কৰি চোৰটোৱে সোণৰ চেইনডাল বন্ধকত থৈ দিয়ে। ১৪ গ্ৰাম ওজনৰ সেই সোণৰ চেইনডালৰ বাবদ বেংকৰ পৰা তেওঁ ৮৫ হাজাৰ টকাৰ গ’ল্ড লোন (Gold Loan) উলিয়াই লয়।
বৰ্তমান ভৰলুমুখ আৰক্ষীয়ে সংশ্লিষ্ট বেংক শাখাৰ পৰা সোণৰ চেইনডাল উদ্ধাৰ কৰিবলৈ সক্ষম হৈছে। চোৰ হীৰেন বৰুৱা এতিয়া আৰক্ষীৰ জিম্মাত।
চিলনী চোৰৰ এনে ‘কৰ্প’ৰেট’ বুদ্ধিৰ কথাই এতিয়া সমগ্ৰ গুৱাহাটীতে ব্যাপক চৰ্চা লাভ কৰিছে।
Continue Reading
