ডিজিটেল ডেস্কঃ অঘটন! বিশ্বায়নৰ এই যুগত এতিয়াও মানুহ সমাজৰ পৰা ইমান বিচ্ছিন্ন হ’ব পাৰেনে? এই ভয়ংকৰ ঘটনাৰ পাছত নানা প্ৰশ্নৰ উত্থাপন হৈছে।
লিবিয়াৰ মৰুভূমিৰ পৰা উদ্ধাৰ হৈছে ২০ জন প্ৰব্ৰজনকাৰীৰ মৃতদেহ। দুসপ্তাহ পূৰ্বে নিৰুদ্দেশ হৈছিল তেওঁলোক। লিবিয়াৰ এম্বুলেন্স ছাৰ্ভিচে জনোৱা মতে, মঙলবাৰে চাদ সীমান্তৰ সমীপৰ মৰুভূমিৰ পৰা মৃতদেহ সমূহ উদ্ধাৰ কৰা হয়।
কেনেকৈ পোহৰলৈ আহিল এই ঘটনা?
মৰুভূমিত পৰি থকা এই মৃতদেহবোৰ প্ৰথমে এজন ট্ৰাক চালকৰ দৃষ্টিগোচৰ হয়। মৰুভূমিৰ বাটটোৰে খোজকাঢ়ি গৈ আছিল তেওঁ। তেওঁৰ জৰিয়তে খবৰ লাভ কৰাৰ পিছতে উদ্ধাৰ কৰা হয় মৃতদেহকেইটা। মৃতদেহ উদ্ধাৰ কৰা অঞ্চলটো কুফ্ৰাৰ পৰা ৩২০ কিলোমিটাৰ দক্ষিণ-পশ্চিমে আৰু চাদ সীমান্তৰ পৰা ১২০ কিলোমিটাৰ দূৰত অৱস্থিত।
লিবিয়াৰ এম্বুলেন্স সেৱাৰ কুফ্ৰা আঞ্চলিক মুৰব্বী ইব্ৰাহিম বেলহাছানে জনায় যে, ‘প্ৰব্ৰজনকাৰীসকলে যাতায়ত কৰা গাড়ীখনৰ চালকে পথ হেৰুৱাইছিল। ১৪ দিন পূৰ্বে মৰুভূমিত তেওঁলোকৰ মৃত্যু হোৱা বুলি আমাৰ অনুমান।’
Continue Reading
