ডিজিটেল ডেস্ক: টেঙাখাতস্থিত অইল ইণ্ডিয়া লিমিটেডৰ (OIL) ITF চৌহদত এক ভয়ংকৰ অগ্নিকাণ্ড সংঘটিত হৈছে। এই দুৰ্ঘটনাটোত এজন লোকৰ কৰুণ মৃত্যু হোৱাৰ লগতে কেইবাজনো লোক গুৰুতৰভাৱে আহত হৈছে। ইফালে, ঘটনাৰ পিছৰে পৰা এজন লোক সন্ধানহীন হৈ থকাত অঞ্চলটোত তীব্ৰ উত্তেজনা আৰু শোকৰ পৰিৱেশে বিৰাজ কৰিছে।
এই ভয়ংকৰ অগ্নিকাণ্ডত এজন লোকৰ প্ৰাণহানি ঘটে। গুৰুতৰভাৱে আহত ব্যক্তিসকল: শৈলেন গগৈ, তাপস গগৈ, কুমুদ গগৈ, গোলাপ দত্ত আৰু ইন্দ্ৰ গগৈ। আহত আটাইকেইজনক ততাতৈয়াকৈ উন্নত চিকিৎসাৰ বাবে অসম চিকিৎসা মহাবিদ্যালয় হাস্পতাললৈ প্ৰেৰণ কৰা হয়।
দুৰ্ঘটনাটোৰ পিছৰে পৰা ৰাজু দত্ত নামৰ এজন লোকৰ কোনো সন্ধান পোৱা নাই। খবৰ পোৱাৰ লগে লগে ঘটনাস্থলীত অইল ইণ্ডিয়াৰ কেইবাখনো অগ্নিনিৰ্বাপক বাহন উপস্থিত হৈ জুই নিৰ্বাপনৰ বাবে যুদ্ধকালীন তৎপৰতা চলায়।
ঘটনাৰ গুৰুত্ব অনুভৱ কৰি অইলৰ শীৰ্ষ বিষয়াৰ লগতে বিভাগীয় বিষয়া-কৰ্মচাৰীসকল তাৎক্ষণিকভাৱে ঘটনাস্থলীত উপস্থিত হৈ সমগ্ৰ পৰিস্থিতিৰ ওপৰত নজৰ ৰাখিছে আৰু উদ্ধাৰ অভিযান ত্বরান্বিত কৰিছে।
এই ভয়ংকৰ দুৰ্ঘটনা কি কাৰণে সংঘটিত হ’ল, সেয়া বৰ্তমানলৈকে জানিব পৰা হোৱা নাই। এই আকস্মিক দুৰ্ঘটনাই সমগ্ৰ টেঙাখাত আৰু অইল চৌহদৰ বৃহত্তৰ অঞ্চলটোত এক আতংকময় পৰিৱেশৰ সৃষ্টি কৰিছে। সন্ধানহীন হৈ থকা লোকজনৰ সন্ধান আৰু জুই সম্পূৰ্ণ নিয়ন্ত্ৰণলৈ অনাৰ বাবে বৰ্তমানো প্ৰচেষ্টা অব্যাহত আছে।
Continue Reading
