পৰিকল্পিতভাৱে গাদীচ্যুত কৰা হৈছিল শ্বেখ হাছিনাক, সাংবাদিকৰ মধ্যস্থতাত মহম্মদ ইউনুছে ছাত্র প্রতিনিধিৰ সৈতে ৰচিছিল চৰকাৰ-বিৰোধী ষড়যন্ত্র

ডিজিটেল ডেস্ক: বাংলাদেশত শ্বেখ হাছিনা নেতৃত্বাধীন চৰকাৰখনক উৎখাত কৰাৰ বাবে ৰচনা কৰা হৈছিল গভীৰ ষড়যন্ত্র। আৱামী লীগৰ মুৰব্বী শ্বেখ হাছিনাৰ পদত্যাগৰ পাছত মহম্মদ ইউনুছ হঠাতে দেশখনৰ অন্তৰ্ৱতী চৰকাৰৰ মুখ্য উপদেষ্টা পদত অধিষ্ঠিত হোৱাটো আছিল সম্পূর্ণ পূর্ব পৰিকল্পিত। দেশখনৰ প্ৰাক্তন মুখ্য উপদেষ্টা ইউনুছৰ প্ৰাক্তন প্রেছ সচিব ছফিকুল আলমে এই বিস্ফোৰক তথ্য প্রকাশ কৰিছে। সামাজিক মাধ্যম 'ফে'চবুক'ত এটা প'ষ্টত আলমে কয় যে প্রাক্তন প্রধানমন্ত্রী হাছিনাই ঢাকা এৰি যোৱাৰ পূৰ্বেই ইউনুছ মুখ্য উপদেষ্টা পদত অধিষ্ঠিত হোৱাটো নিশ্চিত হৈছিল।

এজেঞ্চি ফ্রেন্স প্ৰেছৰ ঢাকাস্থিত সাংবাদিক কুৱাদাৰুদ্দিন শিশিৰৰ জৰিয়তে দেশখনৰ প্ৰতিবাদী ছাত্র সমাজৰ নেতৃত্বই মহম্মদ ইউনুছৰ লগত যোগাযোগ কৰিছিল। দেশখনৰ শাসন ব্যৱস্থা সলনিৰ বাবে সাংবাদিক শিশিৰৰ জৰিয়তে ছাত্র নেতৃত্ব আৰু ইউনুছে অতি গোপনে আলোচনা অব্যাহত ৰাখিছিল। মাত্ৰ কেইজনমান অতি বিশ্বাসী লোকেহে ভিতৰুৱাকৈ কি ঘটি আছে সেয়া জানিব পাৰিছিল। 

প্ৰাক্তন প্রধানমন্ত্রী হাছিনাই পদত্যাগ কৰাৰ পূৰ্বেই ছাত্ৰ প্ৰতিনিধিৰ হৈ সাংবাদিক শিশিৰে মহম্মদ ইউনুছক দেশখনৰ অন্তৰ্ৱতী চৰকাৰৰ মুৰব্বী পদৰ প্রস্তাৱ আগবঢ়াইছিল। শিশিৰৰ এই মন্তব্যই হাছিনা চৰকাৰক ওফৰাবই চলা ষড়যন্ত্রও উন্মোচন কৰিলে। কাৰণ ইয়াৰ পাছতেই দেশখনত ছাত্র আন্দোলনে ভয়াবহ ৰূপ লয় আৰু প্রধানমন্ত্রী হাছিনাই পদত্যাগ কৰাৰ লগতে ভাৰতলৈ পলাই আহিবলৈ বাধ্য হয়। 

ইফালে, শেহতীয়াকৈ প্রাক্তন প্রধানমন্ত্রী হাছিনাৰে সু-সম্পর্ক থকা বাংলাদেশৰ বায়ু সেনাৰ এজন প্ৰাক্তন বিষয়াৰ মৃতদেহ উদ্ধাৰ হোৱাটোৱেও তাৎপর্য বহন কৰিছে। দেশখনৰ বায়ু সেনাৰ প্রাক্তন বিষয়া টাহছিফ ছৌৰিৰ মৃতদেহ ঢাকাৰ তুৰাগ নদীত উদ্ধাৰ হৈছে।

উৎস: দৈনিক জনমভূমি