১০ জুনত ইতিহাস ৰচিব নৰেন্দ্ৰ মোদীয়ে

ডিজিটেল ডেস্ক : প্রধানমন্ত্রী নৰেন্দ্ৰ মোদীয়ে ১০ জুনত আন এক ইতিহাসৰ সৃষ্টি কৰিব। সেইদিনা তেওঁ দেশৰ নিৰ্বাচিত প্ৰধানমন্ত্ৰীসকলৰ ভিতৰত সৰ্বাধিক সময় এই পদত থকা প্ৰধানমন্ত্ৰীৰূপে পৰিগণিত হ'ব। তেওঁ গণতান্ত্রিকভাৱে নিৰ্বাচিত হোৱাৰ পাছত জৱাহৰলাল নেহৰুৰ সুদীর্ঘ কাৰ্যকালৰ অভিলেখো ভংগ কৰিব। 

উল্লেখযোগ্য যে নেহৰুৱে ১৯৪৭ চনত কোনোধৰণৰ নিৰ্বাচন নোহোৱাকৈ প্ৰধানমন্ত্ৰীৰ কাৰ্যভাৰ গ্ৰহণ কৰিছিল। কিন্তু তেওঁ গণতান্ত্রিকভাৱে প্ৰধানমন্ত্ৰীৰ কাৰ্যকাল গ্ৰহণ কৰিছিল ১৯৫২ চনৰ ১৩ মে'ত। উল্লেখযোগ্য যে দেশত প্রথম সংসদীয় নির্বাচন হৈছিল ১৯৫২ চনত আৰু প্ৰথম লোক সভা গঠন হৈছিল সেই বছৰৰ ১৭ এপ্রিলত। 

আনহাতে, লোক সভাৰ প্ৰথম অধিৱেশন আৰম্ভ হৈছিল ১৯৫২ চনৰ ১৩ মে'ত। নেহৰুৱে ১৯৫২ চনৰ ১৩ মে'ত প্ৰধানমন্ত্ৰীৰূপে শপত গ্রহণ কৰে। তেওঁ ১৯৬৪ চনৰ ২৭ মে'ত মৃত্যু হোৱাৰ সময়লৈকে দেশৰ প্রধানমন্ত্রীৰূপে সেৱা আগবঢ়াইছিল। আন কথাত নেহৰু ৪,৩৯৮ দিন প্ৰধানমন্ত্ৰীৰ পদত আছিল। আনহাতে, মোদীয়ে ২০১৪ চনৰ ২৬ মে'ত দেশৰ প্রধানমন্ত্রীৰূপে শপত গ্রহণ কৰিছিল। অহা ১৩ মে'ত তেওঁ প্রধানমন্ত্রী হিচাপে ৪৩৯৯ দিন সম্পূৰ্ণ কৰি নেহৰুৰ অভিলেখ ভংগ কৰিব। ইয়াৰ লগে মোদীয়ে সৰ্বাধিক সময় দেশৰ প্ৰধানমন্ত্ৰী হৈ থকাৰ অভিলেখো গঢ়িব। উল্লেখযোগ্য যে প্ৰয়াত ইন্দিৰা গান্ধী ৪০৭৭ দিন প্রধানমন্ত্ৰীৰ পদত আছিল। 

মোদীয়ে যোৱা বছৰ ২৫ জুলাইত ইন্দিৰা গান্ধীৰ অভিলেখ অতিক্ৰম কৰিছিল। নেহৰু আৰু মোদীয়ে ভিন্ন ভিন্ন পৰিস্থিতিত দেশৰ প্ৰধানমন্ত্ৰীৰ পদ গ্ৰহণ কৰিছিল। নেহৰু দেশৰ প্ৰধানমন্ত্ৰী হৈ থকাৰ সময়ত দেশৰ জনসংখ্যা আছিল ৩৪ কোটি। মোদীয়ে প্ৰধানমন্ত্ৰীৰ কাৰ্যভাৰ গ্ৰহণ কৰাৰ সময়ত দেশৰ জনসংখ্যা আছিল ১৩১ কোটি। আনহাতে, ১৯৫২ চনৰ সাধাৰণ নিৰ্বাচনত ৫৩টা দলে প্রতিদ্বন্দ্বিতা কৰিছিল। ২০১৪ চনৰ সাধাৰণ নিৰ্বাচনত প্রতিদ্বন্দ্বিতা কৰা ৰাজনৈতিক দলৰ সংখ্যা আছিল ৪৬৪টা।

উৎস: দৈনিক জনমভূমি