বৰক্ষেত্ৰীত জুইৰ লেলিহান শিখাত জাহ গ’ল ৫খনকৈ দোকান, ১৫ লক্ষাধিক টকাৰ সা-সম্পত্তি ভস্মীভূত

ডিজিটেল ডেস্ক: নলবাৰী জিলাৰ বৰক্ষেত্ৰী সমষ্টিৰ ন-পাৰা পামস্থিত দেওবৰীয়া বজাৰত সংঘটিত এক ভয়ংকৰ অগ্নিকাণ্ড। জুইৰ লেলিহান শিখাই নিমিষতে ছানি ধৰে কেইবাখনো ব্যৱসায়িক প্ৰতিষ্ঠান। এই বিধ্বংসী অগ্নিকাণ্ডত পাঁচখনকৈ দোকান সম্পূৰ্ণৰূপে ভস্মীভূত হোৱাৰ লগতে প্ৰায় ১৫ লক্ষাধিক টকাৰ সা-সম্পত্তি জুইত জাহ যায়।

প্ৰাপ্ত তথ্য অনুসৰি, আয়ান আলী নামৰ এজন ব্যক্তিৰ কাপোৰৰ দোকানৰ পৰা জুইৰ সূত্ৰপাত ঘটে। পৰৱৰ্তী সময়ত জুই দ্ৰুতগতিত বিয়পি পৰাত ফজৰ আলী, মুঞ্জৰ আলী, আয়ান আলী, কাছেম আলী আৰু ৰফিক আলী নামৰ পাঁচগৰাকী ব্যৱসায়ীৰ দোকানত ব্যাপক ক্ষতিসাধন হয়।

অগ্নিকাণ্ডৰ প্ৰকৃত কাৰণ এতিয়ালৈকে জানিব পৰা হোৱা নাই। অৱশ্যে, বিদ্যুতৰ শ্বৰ্ট চাৰ্কিটৰ ফলত এই অগ্নিকাণ্ড সংঘটিত হোৱা বুলি সন্দেহ প্ৰকাশ কৰিছে স্থানীয় ৰাইজে।

ইফালে, যাতায়তৰ অচল অৱস্থাৰ বাবে ঘটনাস্থলীত অগ্নিনিৰ্বাপক বাহিনী উপস্থিত হ’ব নোৱাৰাৰ ফলত স্থানীয় ৰাইজে তাৎক্ষণিকভাৱে জুই নিৰ্বাপণৰ চেষ্টা চলায়। এই অগ্নিকাণ্ডত সৰ্বস্বান্ত হোৱা ব্যৱসায়ীসকলৰ পৰিয়াললৈ উপযুক্ত ক্ষতিপূৰণ প্ৰদানৰ দাবী জনাইছে স্থানীয় ৰাইজ তথা বিভিন্ন দল-সংগঠনে। ক্ষতিগ্ৰস্ত পৰিয়ালক সহায়ৰ হাত আগবঢ়াবলৈ চৰকাৰ আৰু নলবাৰী জিলা আয়ুক্তৰ ওচৰত দাবী উত্থাপন কৰিছে স্থানীয় ৰাইজে।