অসমৰ নগাঁও জিলাৰ এটা পৰিয়ালৰ অনন্য মানৱতা আৰু বন জীৱনৰ প্ৰতি থকা দায়বদ্ধতাৰ এক কাহিনীয়ে এতিয়া কেন্দ্ৰীয় মাধ্যমিক শিক্ষা পৰিষদ (CBSE) ৰ দশম শ্ৰেণীৰ ইংৰাজী পাঠ্যপুথিত স্থান লাভ কৰিছে। কামপুৰৰ এটা পৰিয়ালে বনৰীয়া মেকুৰীৰ পোৱালি এটা তুলি লৈ ডাঙৰ-দীঘল কৰাৰ এই বিৰল কাহিনীটো পাঠ্যক্ৰমত অন্তৰ্ভুক্ত হোৱাত স্থানীয় অঞ্চলত ব্যাপক আনন্দ আৰু গৌৰৱৰ সৃষ্টি হৈছে।
এই অসাধাৰণ কাহিনীৰ মূল সূত্ৰধাৰ হ'ল কামপুৰ চহৰৰ বৃন্দাবন নগৰ, কৈলাস পথৰ ২ নং ৱাৰ্ডৰ বাসিন্দা ধৰণী শইকীয়া। বন্যপ্ৰাণী উদ্ধাৰৰ কামৰ বাবে স্থানীয়ভাৱে 'বন মানুহ' হিচাপে পৰিচিত ধৰণী শইকীয়াৰ ঘৰতে এই ঘটনা সংঘটিত হৈছিল। ২০০৯ চনত টেটেলিচোৰা গাঁৱত এটা বনৰীয়া মেকুৰীৰ পোৱালি, যিটোক স্থানীয়ভাৱে 'জাহামাল' বুলি জনা যায়, গছৰ পৰা সৰি পৰিছিল। স্থানীয় লোকে এই বিষয়ে অৱগত কৰাৰ পাছত ধৰণীয়ে তেওঁৰ জ্যেষ্ঠ পুত্ৰৰ সহায়ত অসহায় পোৱালিটোক ঘৰলৈ লৈ আহে, যিয়ে তেওঁলোকৰ জীৱনত এক নতুন অধ্যায়ৰ সূচনা কৰে।
নৱজাতক পোৱালিটোক কেনেকৈ জীয়াই ৰখা হ'ব, তাক লৈ পৰিয়ালটো চিন্তাত পৰিছিল। সেই সময়তে ধৰণীৰ পত্নী অঞ্জলি শইকীয়াই এক অভাৱনীয় আৰু ত্যাগৰ সিদ্ধান্ত লয়। তেওঁ নিজৰ ছমহীয়া পুত্ৰ গিবন শইকীয়াৰ সৈতে সেই পোৱালিটোকো নিজৰ মাতৃ দুগ্ধ পান কৰাই লালন-পালন কৰাৰ দায়িত্ব লয়। পোৱালিটোৰ নাম ৰখা হৈছিল 'ভকত'।
'ভকত' নামৰ এই বনৰীয়া মেকুৰী পোৱালিটো পৰিয়ালটোৰ অবিচ্ছেদ্য অংগ হৈ পৰে। চাহৰ পৰা ভাত, মাছ, মাংসলৈকে সকলো খাদ্যই সি পৰিয়ালৰ আন সদস্যৰ সৈতে ভাগ বতৰা কৰিছিল। আনকি সি শিশুসকলৰ সৈতে একেখন বিছনাতে শুইছিল। সেই একেটা বৰ্ষতে সংৰক্ষণ ফটোগ্ৰাফাৰ ৰোমেল শানমুগানে এই ঘটনাৰ বিষয়ে জানিব পাৰিছিল আৰু এই ঘটনাটো লিপিবদ্ধ কৰিবলৈ দহ দিন কামপুৰত কটাইছিল। এই কাহিনীয়ে এতিয়া দেশৰ আগশাৰীৰ শিক্ষা ব’ৰ্ডৰ পাঠ্যপুথিত স্থান লাভ কৰাটোৱে স্থানীয় অঞ্চলৰ লগতে সমগ্ৰ অসমলৈ গৌৰৱ কঢ়িয়াই আনিছে।
এই কাহিনীয়ে কেৱল অসমৰেই নহয়, সমগ্ৰ দেশৰ ছাত্ৰ-ছাত্ৰীসকলক জীৱ-জন্তুৰ প্ৰতি মৰম আৰু সহানুভূতিৰ এক অমূল্য বাৰ্তা প্ৰেৰণ কৰিব বুলি আশা কৰা হৈছে।
Continue Reading
