অক্সিজেনৰ নাটনি, দিল্লীৰ হাস্পতালত মৃত্যু ২৫জনৰ

নতুন দিল্লী : ক’ভিড সংক্ৰমণৰ ভয়াৱহতাৰ মাজতে দেশৰ বিভিন্ন আগশাৰীৰ চিকিৎসালয়ত অক্সিজেনৰ নাটনিয়ে সৃষ্টি কৰিছে অভূতপূৰ্ব পৰিস্থিতিৰ। দিল্লী-মহাৰাষ্ট্ৰত এই সংকট হৈ পৰিছে অতি ভয়ংকৰ। দিল্লীৰ ‘জয়পুৰ গোল্ডেন হাস্পতাল’ত কালি নিশা অক্সিজেন অভাৱত মৃত্যু হয় কমেও ২৫জন কৰ’না আক্ৰান্তৰ।

আৰু পঢ়িব পাৰিব: ক’ভিডৰ পৰা হাত সাৰি যোৱা নাই পৃথিৱীৰ সৰ্বোচ্চ শৃংগও…

চিকিৎসালয় কৰ্তৃপক্ষৰ এগৰাকী শীৰ্ষ বিষয়াই দেশৰ ৰাজধানীত থকা হাস্পতালখনৰ এই শোচনীয় অৱস্থাৰ কথা প্ৰকাশ কৰিছে। চিকিৎসাত ব্যৱহৃত অক্সিজেনৰ নাটনিয়ে হাস্পতালখনত চিকিৎসাধীন ৰোগীসকলৰ বাবে কাল হৈ পৰে। বিষয়াগৰাকীয়ে কয়, ‘আমাক ৩.৫মেট্ৰিকটন অক্সিজেনৰ অনুমোদন দিয়া হৈছিল। কালি সন্ধিয়া ৫বজাত এই অক্সিজেন আমি লাভ কৰাৰ কথা আছিল। কিন্তু অক্সিজেন মাজনিশাহে যোগান ধৰা হয়।

আৰু পঢ়িব পাৰিব: চৌদি আৰবৰ নতুন পাঠ্যক্ৰমত ৰামায়ণ, মহাভাৰত অন্তৰ্ভুক্ত

অক্সিজেন অহালৈ ২৫জনকৈ চিকিৎসাধীন ৰোগীৰ মৃত্যু হয়।’ হাস্পতালখনত ২১৫জন ক’ভিড আক্ৰান্ত হৈ গুৰুতৰ স্বাস্থ্য সংকটত ভোগা ৰোগী চিকিৎসাধীন হৈ আছে। আৰু তেওঁলোকক অক্সিজেন দিয়াটো অতি জৰুৰী। চিকিৎসালয়খনে এতিয়া সহায় বিচাৰি দিল্লী উচ্চ ন্যায়ালয়ৰ কাষ চাপিছে। প্ৰয়োজনীয় অক্সিজেনৰ যোগানেৰে ৰোগীৰ জীৱন ৰক্ষা কৰিবলৈ ন্যায়ালয়ত দিয়া আবেদনত অনুৰোধ জনাইছে চিকিৎসালয়খনে।