ডিজিটেল ডেস্কঃ দেহৰ ওজন কমাবৰ বাবে প্লাষ্টিক চাৰ্জাৰী কৰিছিল এগৰাকী অভিনেত্ৰীয়ে। সেয়াই কাল হল অভিনেত্ৰীগৰাকীৰ বাবে। প্লাষ্টিক চাৰ্জাৰীৰ পাছতেই মৃত্যুক সাৱটিলে ২১ বছৰীয়া বিখ্যাত কানাড়া টিভি অভিনেত্ৰী চেতনা ৰাজে (Chetana Raj)। বাংগালুৰৰ এখন ব্যক্তিগত চিকিৎসালয়ত শেষ নিশ্বাস ত্যাগ কৰিলে চেতনাই। মৃত্যুৰ মাত্ৰ এদিন পূৰ্বে ওজন কমাবৰ বাবে চেতনাই প্লাষ্টিক চাৰ্জাৰী কৰিছিল।
অস্ত্ৰোপচাৰত হোৱা ভুলৰ বাবে পাছদিনাই তেওঁৰ হাওঁফাওঁত সমস্যাই দেখা দিয়ে। হাওঁফাওঁৰ সমস্যাই গুৰুতৰ ৰূুপ লোৱাত চেতনা ৰাজৰ মৃত্যু হয়। চেতনাই পিতৃ-মাতৃক অস্ত্ৰোপচাৰৰ কথা কোৱা নাছিল। বন্ধু-বান্ধৱীৰ সৈতে লগ লাগি তেওঁ অকলে অস্ত্ৰোপচাৰৰ বাবে চিকিৎসালয়ত ভৰ্তি হৈছিল। অস্ত্ৰোপচাৰৰ পাছত অভিনেত্ৰীগৰাকীৰ শৰীৰত কিছু জটিলতা আৰম্ভ হয় আৰু অভিনেত্ৰীগৰাকীৰ হাওঁফাওঁত তৰল পদাৰ্থ জমা হ’বলৈ ধৰে, তাৰপাছতে চেতনাৰ মৃত্যু হয়।
অভিনেত্ৰীগৰাকীৰ অভিভাৱকে চিকিৎসকসকলৰ গাফিলতিৰ অভিযোগ উত্থাপন কৰাৰ লগতে চিকিৎসালয়খনৰ প্ৰশাসনৰ বিৰুদ্ধেও এজাহাৰ দাখিল কৰিছে। চেতনাৰ কথা ক’বলৈ গ’লে তেওঁ আছিল কানাড়া টিভি উদ্যোগৰ এগৰাকী বিখ্যাত অভিনেত্ৰী।
বহু টিভি শ্ব’ত কাম কৰি তেওঁ নিজৰ বিশেষ পৰিচয় গঢ়ি তুলিছিল। গীতা আৰু দোৰেছানী ধাৰাবাহিকত কৰা শক্তিশালী অভিনয়ৰ বাবে পৰিচিত হৈ পৰিছিল চেতনা ৰাজ। চেতনাই হঠাৎ এই পৃথিৱীৰ পৰা আঁতৰি যোৱাত তেওঁৰ পৰিয়ালটো গভীৰভাৱে দুখত ভাগি পৰিছে। চেতনাৰ মৃত্যুৰ খবৰ পাই তেওঁৰ অনুৰাগীসকল শোকত মৰ্মাহত হৈ পৰিছে।
Continue Reading
