অসম চৰকাৰৰ গুৰুত্বপূৰ্ণ সিদ্ধান্ত: প্ৰাদেশীকৃত মহাবিদ্যালয়ৰ পদসমূহ স্থায়ী কৰিলে

ৰাজ্যৰ উচ্চ শিক্ষা খণ্ডত এক গুৰুত্বপূৰ্ণ পদক্ষেপ হিচাপে অসম চৰকাৰে প্ৰাদেশীকৃত মহাবিদ্যালয়সমূহৰ সকলো শিক্ষক আৰু অশিক্ষক পদ স্থায়ীভাৱে ধৰি ৰখাৰ নিৰ্দেশ জাৰি কৰিছে। ২০১১ চনৰ অসম ভেঞ্চাৰ শিক্ষা প্ৰতিষ্ঠান (সেৱা প্ৰাদেশিকীকৰণ) আইন আৰু ইয়াৰ ২০১৩ চনৰ সংশোধনীৰ অধীনত সৃষ্টি হোৱা এই পদসমূহ এতিয়া উচ্চ শিক্ষা বিভাগৰ অধীনত অনুমোদিত পদ হিচাপে বিবেচিত হ'ব।

উচ্চ শিক্ষা বিভাগে জাৰি কৰা এক অধিসূচনাত এই কথা স্পষ্ট কৰা হৈছে। এই নিৰ্দেশনা ২০২৬ চনৰ ১০ জুলাইত অনুষ্ঠিত কেবিনেট বৈঠকত লোৱা সিদ্ধান্তৰ পাছত আহিছে আৰু ততাতৈয়াকৈ কাৰ্যকৰী হৈছে। চৰকাৰে জনাইছে যে এই পদসমূহ ব্যক্তিগত পদ হিচাপে গণ্য কৰা নহ'ব বৰঞ্চ সংশ্লিষ্ট মহাবিদ্যালয়সমূহৰ স্থায়ী পদ হিচাপে থাকিব। ইয়াৰ অৰ্থ হ'ল, কোনো কৰ্মচাৰীৰ অৱসৰ, পদত্যাগ, মৃত্যু বা অন্য কোনো কাৰণত পদ খালী হ'লেও পদসমূহ বিদ্যমান থাকিব।

অধিসূচনাত লগতে কোৱা হৈছে যে এই স্থায়ীভাৱে ধৰি ৰখা পদসমূহত সৃষ্টি হোৱা সকলো খালী পদ চৰকাৰে প্ৰচলিত নিযুক্তি নিয়ম, বিধিবদ্ধ বিধান আৰু চৰকাৰী নীতি অনুসৰি পূৰণ কৰিব। এই পদসমূহৰ স্থায়ী স্থিতি নিশ্চিত কৰাৰ ফলত ৰাজ্যৰ প্ৰাদেশীকৃত মহাবিদ্যালয়সমূহৰ শৈক্ষিক আৰু প্ৰশাসনিক কাম-কাজত এক স্থিৰতা আহিব বুলি আশা কৰা হৈছে।

এই সিদ্ধান্তই শিক্ষক আৰু অশিক্ষক কৰ্মচাৰীসকলৰ মাজত দীৰ্ঘদিন ধৰি চলি থকা অনিশ্চয়তা দূৰ কৰাত সহায় কৰিব বুলি চৰকাৰী সূত্ৰই প্ৰকাশ কৰিছে। ইয়াৰ দ্বাৰা শিক্ষা ব্যৱস্থাৰ মান উন্নত কৰাৰ বাবেও সহায়ক হ'ব বুলি ধাৰণা কৰা হৈছে।