অসম চুক্তিত সমগ্ৰ বাংলাদেশ সীমান্ত বেৰা বন্ধৰ দাবী নকৰাটো ঐতিহাসিক ভুল: মুখ্যমন্ত্ৰী শৰ্মা

গুৱাহাটী: অসমৰ মুখ্যমন্ত্ৰী হিমন্ত বিশ্ব শৰ্মাই ১৯৮৫ চনৰ ঐতিহাসিক অসম চুক্তিত এক ডাঙৰ ভুল ৰৈ যোৱা বুলি মন্তব্য কৰিছে। শনিবাৰে গুৱাহাটীত বিজেপিৰ মুখ্য কাৰ্যালয়ত অনুষ্ঠিত এক কাৰ্যসূচীত অংশগ্ৰহণ কৰি মুখ্যমন্ত্ৰী শৰ্মাই কয় যে সেই সময়ত অবৈধ অনুপ্ৰৱেশ বিৰোধী আন্দোলনৰ পৰিপ্ৰেক্ষিতত স্বাক্ষৰিত হোৱা অসম চুক্তিত কেৱল অসমৰ সীমান্ত বেৰা বন্ধৰ দাবী কৰাৰ পৰিৱৰ্তে সমগ্ৰ ভাৰত-বাংলাদেশ সীমান্ত বেৰা বন্ধৰ দাবী কৰা উচিত আছিল। তেওঁ এই সিদ্ধান্তক ৰাজ্যখনৰ বাবে সুদূৰপ্ৰসাৰী প্ৰভাৱ পেলোৱা এক 'ঐতিহাসিক ভুল' বুলি অভিহিত কৰে।

মুখ্যমন্ত্ৰী শৰ্মাৰ মতে, চুক্তি স্বাক্ষৰৰ সময়ত অসম, মেঘালয়, ত্ৰিপুৰা, মিজোৰাম আৰু পশ্চিমবংগ – এই পাঁচখন সীমান্তৱৰ্তী ৰাজ্যৰ মাজেৰে থকা সমগ্ৰ আন্তঃৰাষ্ট্ৰীয় সীমান্ত সুৰক্ষিত কৰাত গুৰুত্ব দিয়া উচিত আছিল। তেওঁ সেই সময়ৰ কংগ্ৰেছ চৰকাৰক তীব্ৰ সমালোচনা কৰি কয়, “কংগ্ৰেছে অসমৰ জনসাধাৰণক ফান্দত পেলাইছিল যেতিয়া তেওঁলোকে কেৱল অসমৰ সীমান্ত বেৰা বন্ধ কৰি আন ৰাজ্যসমূহত সীমান্ত মুকলি কৰি ৰাখিছিল।” তেওঁ লগতে কয় যে ইয়াৰ ফলস্বৰূপে আন ৰাজ্যসমূহৰ মাজেৰে বিদেশীৰ অনুপ্ৰৱেশ হৈছিল আৰু পিছলৈ তেওঁলোক অসমেদি প্ৰৱেশ কৰিছিল।

মুখ্যমন্ত্ৰীয়ে প্ৰকাশ কৰে যে বৰ্তমানৰ বিজেপি নেতৃত্বাধীন কেন্দ্ৰীয় চৰকাৰে এই ঐতিহাসিক ভুল শুধৰাবলৈ পদক্ষেপ গ্ৰহণ কৰিছে। তেওঁ জনাই যে প্ৰধানমন্ত্ৰী নৰেন্দ্ৰ মোদীৰ উদ্যোগত ইতিমধ্যে মেঘালয় আৰু ত্ৰিপুৰাত সীমান্ত বেৰা নিৰ্মাণৰ কাম আৰম্ভ হৈছে আৰু অতি সোনকালে পশ্চিমবংগতো এই কাম আৰম্ভ হ'ব। এই প্ৰচেষ্টাৰ জৰিয়তে সমগ্ৰ ভাৰত-বাংলাদেশ সীমান্ত সুৰক্ষিত কৰাৰ লক্ষ্য নিৰ্ধাৰণ কৰা হৈছে বুলি মুখ্যমন্ত্ৰীয়ে মন্তব্য কৰে।