ডিজিটেল ডেস্কঃ ভাৰতৰ প্ৰধানমন্ত্ৰী নৰেন্দ্ৰ মোদীয়ে চৰকাৰী ভ্ৰমণসূচীলৈ সোমবাৰে ৰাছিয়াত উপস্থিত হয় । মোদীয়ে ৰাছিয়াৰ ৰাষ্ট্ৰপতি পুটিনৰ সৈতে নৈশভোজত মিলিত হোৱাৰ লগতে নানান বিষয়ত আলোচনা কৰে। পুটিন-মোদীৰ আলোচনাকালতে সিদ্ধান্ত লোৱা হয় যে ৰুছ সেনাবাহিনীত কৰ্মৰত ভাৰতীয়ক মুক্ত কৰি দিব ৰাছিয়াই। এয়া মোদীৰ ৰাছিয়া ভ্ৰমণৰ এক বিশেষ সুফল হিচাবে পৰিগণিত হৈছে।
উল্লেখ্য ৰাছিয়া-ইউক্ৰেইন যুদ্ধত ৰাছিয়াই বহু ভাৰতীয় লোকক সেনা জোৱান হিচাবে নিয়োগ কৰিছিল। তেওঁলোকৰ মাজৰে বহু কেইজন ভাৰতীয় লোকৰ যুদ্ধত মৃত্যু ঘটিছিল। এই কথাই উদ্বিগ্ন কৰি তুলিছিল ভাৰত চৰকাৰক। ৰাছিয়াৰ সেনা বাহিনীত থকা ভাৰতীয় লোকসকলক মুক্ত কৰি অনাৰ বাবে সেয়ে ভাৰত চৰকাৰে পদক্ষেপ গ্ৰহণ কৰিছিল।
ভাৰতৰ বৈদেশিক পৰিক্ৰমা মন্ত্ৰী এছ জয়শংকৰৰেও বিষয়টো আগুৱাই নিছিল। তেনে প্ৰচেষ্টাৰ ফলতে ৰাছিয়াই দেশ খনৰ সেনা বাহিনীত নিয়োগ কৰা ভাৰতীয় লোকসকলক মুকলি কৰি দিয়াৰ সিদ্ধান্ত লৈছে বুলি জানিব পৰা গৈছে।
জয়শংকৰে কয় যে প্ৰকৃততে কিমান সংখ্যক ভাৰতীয় লোকক ৰুছ সেনাত নিয়োগ কৰা হৈছে সেই তথ্য এতিয়াও পোৱা হোৱা নাই। ৰুছ সেনাৰ পৰা অব্যাহতি লোৱাৰ পিছত ভাৰতীয় লোকসকলে পুনৰ ভাৰতলৈ উভতি আহিব বুলি তেওঁ কয়।
Continue Reading
