ডিজিটেল ডেস্ক: আৰম্ভ হৈছে আন এক যুদ্ধৰ কাউণ্ট-ডাউন৷ মাত্ৰ ৪৮ ঘণ্টাৰ ভিতৰতে ইজৰাইলক আক্ৰমণ কৰিব পাৰে ইৰানে৷ যাৰ পাছতে সমগ্ৰ মধ্য প্ৰাচ্যত এতিয়া আন এক যুদ্ধৰ আশংকা৷ হামাছৰ বিৰুদ্ধে ছমাহে যুদ্ধ অব্যাহত ৰখা বেঞ্জামিন নেতন্যাহুৰ ইজৰাইলে এইবাৰ আন এক ফ্ৰণ্টত ইৰানৰে মুখামুখিৰ আশংকা৷ ইতিমধ্যে ছিৰিয়া, লেবানন, ইৰাক আৰু য়েমেনলৈ সম্প্ৰসাৰিত হৈছিল ইজৰাইল–হামাছ সংঘৰ্ষৰ জুই৷
তেনে সময়তে এইবাৰ ইজৰাইলক আক্ৰমণৰ হুংকাৰ ইৰানৰ৷ কিয়নো ১ এপ্ৰিলত ছিৰিয়াৰ ইৰানী ৰাষ্ট্রদূতৰ কাৰ্যালয়ত আক্ৰমণ চলাইছিল ইজৰাইলে৷ য’ত নিহত হৈছিল ১৩ ইৰানী নাগৰিকৰ৷ আৰু ইজৰাইলৰ এই কাৰ্যৰ পোটক তোলাৰ বাবে এতিয়া হুংকাৰ দিছে ইৰানে৷ ইতিমধ্যে যুদ্ধৰ দামামা বাজি উঠাৰ পাছতে তৎপৰ হৈ পৰিছে আমেৰিকা৷ মাৰ্কিন যুক্তৰাষ্ট্রৰ বিশাল ৰণতৰী USS আইজেনহাৱাৰক ইতিমধ্যে প্ৰেৰণ কৰা হৈছে ইজৰাইললৈ৷ ইৰানৰ যিকোনো মিছাইল আৰু ড্ৰোণ আক্ৰমণ প্ৰতিহত কৰিব মাৰ্কিন যুদ্ধ জাহাজখনে৷
ইতিপূৰ্বে ইজৰাইলৰ ওপৰত আক্ৰমণ নচলোৱাৰ বাবে ইৰানক সকীয়নি প্ৰদান কৰিছে আমেৰিকাই৷ তাৰ বিপৰীতে এই বিবাদৰ পৰা আমেৰিকাক আঁতৰি থাকিবলৈ আহ্বান জনাইছে ইৰানে৷ আনহাতে এই সংঘাতক লৈ সমগ্ৰ বিশ্বজুৰি সৃষ্টি হৈছে তীব্ৰ উত্তেজনাৰ৷ ভাৰতকে ধৰি আমেৰিকা, ৰাছিয়া, জাৰ্মানী, ফ্ৰান্স আৰু ব্ৰিটেইনে নিজৰ নাগৰিকলৈ জাৰি কৰিছে SOP৷ ইৰান আৰু ইজৰাইল ভ্ৰমণ নকৰিবলৈ নাগৰিকলৈ আহ্বান ৬ ৰাষ্ট্রৰ৷ ইৰানত ৪ হাজাৰ আৰু ইজৰাইলত আছে ১৮ হাজাৰ ৫০০ ভাৰতীয় নাগৰিক৷ যাক লৈ সতৰ্কতা অৱলম্বন কৰিছে ভাৰতে৷
ইতিমধ্যে নিজৰ নাগৰিকৰ বাবে ভাৰত চৰকাৰে জাৰি কৰিছে হেল্পলাইন নাম্বাৰ৷ তাৰ মাজতে ইৰানৰ এয়াৰস্পেছ ব্যৱহাৰ নকৰাৰ সিদ্ধান্ত লৈছে এয়াৰ ইণ্ডিয়াই৷ একদৰে জাৰ্মানী আৰু অষ্ট্রিয়াৰ বিমান সংস্থাইও পৰিহাৰ কৰিছে ইৰানী এয়াৰস্পেছ৷ আনহাতে ইৰানৰ ৰাজধানী তেহৰানত থকা দূতাবাস বন্ধ কৰিছে নেডাৰলেণ্ডে৷
তাৰ মাজতে ইজৰাইলৰ বহু স্থানত মোক্ষম আঘাত সনাৰ বাবে সাজু হৈছে ইৰানী সেনা৷ আনহাতে মধ্য প্ৰাচ্যৰ ৮খন দেশত থকা মাৰ্কিন সেনা সাজু হৈছে ইজৰাইলৰ সুৰক্ষাৰ বাবে৷
Continue Reading
