ডিজিটেল ডেস্কঃ ৰাজ্যৰ সকলো সমস্যা পাহৰি এতিয়া পূৰ্বোত্তৰবাসী বিশেষকৈ গুৱাহাটীবাসী আক্রান্ত আই পি এল জ্বৰত। আই পি এল ২০২৫ক লৈ এতিয়া ব্যস্ত হৈ পৰিছে ৰাজ্যবাসী। কোনোবা যদি ৰিয়ান পৰাগৰ ফেন, কোনোবাজন আকৌ ধোনীৰ। কোনোবাই আকৌ আশা কৰি আছে সোঁশৰীৰে কিং খানক এবাৰ গুৱাহাটীত প্রত্যক্ষ কৰাৰ। ২৬ মার্চ আৰু ৩০ মাৰ্চৰ গুৱাহাটীৰ খেল চাবলৈ সাজু হৈছে ৰাজ্যবাসী।
উল্লেখযোগ্য যে আজি ২৬ মার্চত বর্ষাপাৰাত সমুখসমৰত নামিব কলকাতা নাইট ৰাইডাৰ্ছ আৰু ৰাজস্থান ৰয়েলছ। আনহাতে, ৩০ মাৰ্চত মুখামুখি হ'ব ৰাজস্থান ৰয়েলছ আৰু চেন্নাই ছুপাৰ কিংছ। দুয়োখন হাইভল্টেজ মেচতে ৰানৰ জোৱাৰ উঠিব বুলি ক্রিকেটপ্রেমীসকল অত্যন্ত আশাবাদী। সকলোৱেই আশা কৰিছে এইবাৰ শেষ আই পি এলত অংশগ্রহণ কৰা ধোনীয়ে বর্ষাপাৰাৰ সেউজ দলিচা কঁপাই তুলিব ধোনীৰ ট্রেডমার্ক হেলিকপ্টাৰ শ্বটেৰে। এই হাইভল্টেজ মেচ দুখনৰ বাবে মহানগৰীৰ যান-বাহন আৰক্ষীয়েও গ্রহণ কৰিছে কেতবোৰ বিশেষ ব্যৱস্থা। সেই অনুসৰি মেচৰ দুদিন বিয়লি ২ বজাৰ পৰা নিশা ১ বজা পর্যন্ত জি এছ ৰ'ড, বি কে কাকতী ৰ'ড, এ টি ৰ'ড, এম জি ৰ'ড, কাহিলিপাৰা পথকে ধৰি বহুকেইটা পথত বন্ধ থাকিব বাণিজ্যিক যান-বাহনৰ চলাচল।
সেইদৰে যান-বাহন শাখাৰ নিৰ্দেশনা অনুসৰি মহানগৰীৰ এ কে আজাদ ৰ'ড ৱান বে' হ'ব আৰু ৩ বজাৰ পাছত চাইকেল ফেক্টৰীৰ দিশৰ পৰা লালগণেশ তিনিআলিলৈ চলাচল কৰিব নোৱাৰিব যান-বাহন। বিয়লি ৪-৩০ বজাত বর্ষাপাৰা ষ্টেডিয়ামৰ গেট খোল খাব আৰু তেতিয়াৰ পৰা লালগণেশৰ পৰা বর্ষাপাৰালৈ পাছ থকা বাহনহে আহিব পাৰিব। মুঠ ৬খন গে'টেৰে দৰ্শক ষ্টেডিয়ামত প্ৰৱেশ কৰিব পাৰিব। ইফালে, আজি বর্ষাপাৰাত বলিউডৰ চেলিব্রেটি জেকুলিন ফার্নাণ্ডেজক চাম বুলি আশা কৰি থকাসকলৰ বাবে দুঃখবৰ- মাতৃৰ অসুস্থতাৰ বাবে জেকুলিন আহিব নোৱাৰিব। কিন্তু হ'লেও কিং খানকে ধৰি বলিউডৰ আনসকল চেলিব্রেটিয়ে গুৱাহাটী ৰঙীন কৰি তুলিব।
Continue Reading
