ডিজিটেল ডেস্ক : শিৱসাগৰ জিলা অনুসূচিত জাতি ছাত্ৰ সন্থা আৰু সদৌ অসম অনুসূচিত জাতি মহিলা ঐক্য মঞ্চই অহা ১২ মে'ত শিৱসাগৰৰ ব'র্ডিং থেলপথাৰত মহাসতী ৰাধিকা স্মৃতি দিৱস উদযাপন কৰিবলৈ আগবাঢ়িছে। অনুষ্ঠানৰ লগত সংগতি ৰাখি দৌৰবিদ হিমা দাসক প্ৰদান কৰিব 'কৈৱৰ্ত কুল ৰত্ন বঁটা'।
দেওবাৰে সংগঠন দুটাই এক সংবাদমেল সম্বোধন কৰি কয় যে সতী ৰাধিকা চৰিত্ৰটো হৈছে উচ্চ-নীচ, ভেদ-ভাব থকা সমাজখনৰ বিৰুদ্ধে 'এটা প্রচণ্ড চৰ'। মহীয়সী নাৰী সতী ৰাধিকাৰ চৰিত্ৰটোৱে সমিলমিলেৰে একত্রিতভাৱে এখন সমাজ গঢ়াৰ বার্তাকেই বহন কৰে।
বৰ্তমান সময়ত সতী ৰাধিকাৰ আদৰ্শক প্রতিষ্ঠা কৰাৰ প্রয়োজনীয়তা আহি পৰিছে। এই স্মৃতি দিৱসতে চৰকাৰক সতী ৰাধিকাৰ নামত অসমত এখন বিশ্ববিদ্যালয় আৰু সমন্বয় ক্ষেত্র স্থাপন, বটদ্ৰৱাত যি সমন্বয় ক্ষেত্র আছে সেয়া সংৰক্ষণ কৰি শোভাবর্ধনৰ ব্যৱস্থা কৰি পৰ্যটনথলী হিচাপে ঘোষণা কৰা, দীঘলীপুখুৰীৰ পাৰত যি সতী ৰাধিকাৰ উদ্যান চৰকাৰে ইতিমধ্যে ভাঙি পেলাইছে, সেই উদ্যানখন পুনৰ নিৰ্মাণৰ ব্যৱস্থা কৰা, চৰকাৰে প্ৰতি বছৰে মহাসতী ৰাধিকা উৎসৱ আয়োজন কৰিবলৈ চৰকাৰক আহ্বানকে ধৰি চৰকাৰলৈ কেইবাটাও দাবী জনাব সংগঠন দুটাই।
অসমৰ বিভিন্ন প্ৰান্তৰৰ বিশিষ্ট ব্যক্তিয়ে অনুষ্ঠানটোত অংশগ্ৰহণ কৰিব আৰু প্ৰায় এক লাখ লোকৰ সমাগম হ'ব বুলিও জানিবলৈ দিছে সংবাদমেলত। অনুষ্ঠানটোত অসমৰ মানসপটত এটা মূল্যৱান চৰিত্ৰ হিচাপে সতী ৰাধিকাক প্ৰতিষ্ঠাৰ প্ৰয়াস কৰা হ'ব বুলি শিৱসাগৰ জিলা অনুসূচিত জাতি ছাত্ৰ সন্থা আৰু সদৌ অসম অনুসূচিত জাতি মহিলা মহিলা ঐক্য মঞ্চই জানিবলৈ দিছে।
উৎস- দৈনিক জনমভূমি
Continue Reading
