ডিজিটেল ডেস্কঃ চাহ ৰপ্তানিত ভাৰতে এতিয়া বিশ্বৰ ভিতৰত দ্বিতীয় স্থান লাভ কৰিছে। ভাৰতে শ্রীলংকাক পিছ পেলাই দ্বিতীয় স্থান অধিকাৰ কৰে। ভাৰতীয় চাহ ব'র্ডে এই কথা প্ৰকাশ কৰিছে। ব'ৰ্ডে প্ৰকাশ কৰা অনুসৰি ভাৰতে যোৱা বছৰ ২৫.৫ কোটি কিল'গ্রাম চাহ ৰপ্তানি কৰে।
চাহ ৰপ্তানিত কেনিয়া বিশ্বৰ ভিতৰত প্ৰথম স্থানত আছে। বিশ্বত ভূৰাজনৈতিক উত্তেজনা চলি থকা সত্ত্বেও ভাৰতে ২০২৪ বর্ষত বিগত ১০ বছৰৰ ভিতৰত সৰ্বাধিক পৰিমাণৰ চাহ ৰপ্তানি কৰে। এই বছৰটোত ভাৰতে চাহপাত ৰপ্তানি কৰি ৭১১১ কোটি টকা উপাৰ্জন কৰে। উল্লেখযোগ্য যে ২০২৩ বৰ্ষত ভাৰতে ২৩.১৬ কোটি কিল'গ্রাম চাহপাত ৰপ্তানি কৰে আৰু ইয়াৰ পৰা ৬,১৬১ কোটি টকা উপার্জন কৰিছিল।
যোৱা বছৰ চাহ ৰপ্তানিৰ হাৰ ১০% বৃদ্ধি পায়। ২০২৪ বর্ষত অসম আৰু পশ্চিম বংগই ১৫.৫ কোটি কিল'গ্রাম চাহপাত ৰপ্তানি কৰে। ইয়াৰ পৰা উপাৰ্জন কৰে ৪,৮৩৩ কোটি টকা। আনহাতে, দক্ষিণ ভাৰতৰ ৰাজ্যসমূহে ৯.৯৮ কোটি কিল'গ্রাম চাহপাত ৰপ্তানি কৰি ২,২৭৮ কোটি টকা উপার্জন কৰে। চাহ ৰপ্তানিত অসম আৰু পশ্চিম বংগৰ অৱদান আছিল ৬০.৭৯%। ভাৰতে বিশ্বৰ ২৫খনতকৈও অধিক দেশলৈ চাহ ৰপ্তানি কৰে।
ভাৰতৰ চাহপাত সংযুক্ত আৰব আমিৰাট, ইৰাক, ইৰান, আমেৰিকা আৰু ব্রিটেইনলৈ সর্বাধিক পৰিমাণৰ ৰপ্তানি কৰা হয়। শ্রীলংকাত চাহৰ উৎপাদন হ্রাস পোৱাৰ ফলত ভাৰতীয় ব্যৱসায়ীসকলে পশ্চিম এছিয়াৰ বজাৰত সুযোগ লাভ কৰে।
উল্লেখযোগ্য যে বিশ্বৰ মুঠ ৰপ্তানিৰ প্ৰায় দহ শতাংশ চাহপাত ভাৰতৰ। বিশ্বত অসম, দার্জিলিং আৰু নিলগিৰিৰ চাহপাতৰ বিশেষ সুনাম আছে। ভাৰতৰ পৰা 'ব্লেক টী' সর্বাধিক পৰিমাণে (প্রায় ৯৬%) ৰপ্তানি কৰা হয়। ইয়াৰ উপৰি চি টি চি, গ্রীন 'টী, হার্বল চাহ, - মছলা চাহ, লেমন টীও বিদেশলৈ প্ৰেৰণ কৰা হয়। এতিয়া দেশৰ মুঠ, চাহপাত উৎপাদনত ক্ষুদ্র চাহ খেতিয়কে বৃহৎ অৱদান আগবঢ়াইছে।
উৎস- দৈনিক জনমভূমি
Continue Reading
