ডিজিটেল ডেস্ক: ‘‘অসমৰ মানুহৰ ঘৰত ভগৱানৰ ফটো কম, জুবিন গাৰ্গৰ ফটো বেছি৷ সকলো মানুহৰ ঘৰ, দোকানত থাকে জুবিন গাৰ্গৰ ফটো৷ জুবিনক্ষেত্ৰত গ’লে দেখা পোৱা যায় জুবিন গাৰ্গৰ প্ৰতি এতিয়াও কিমান মৰম আছে অসমবাসীৰ৷ ’’ এই মন্তব্য বিহাৰৰ এজন যুৱক তাজ আলমৰ৷
বিনা খৰচত সমগ্ৰ ভাৰত ভ্ৰমণৰ উদ্দেশ্যে ওলাই অহা যুৱকজনে অসম আৰু জুবিন গাৰ্গৰ বিষয়ে এনেদৰে কৰে মন্তব্য৷ ইতিমধ্যে বিহাৰ, উত্তৰ প্ৰদেশ আৰু পশ্চিমবংগ পাৰ হৈ অসমত উপস্থিত হোৱা যুৱকজনে এতিয়া ডিমাপুৰ আৰু নাগালেণ্ড অভিমুখে ৰাওনা হৈছে।
জানিব পৰা মতে, ধন খৰচ নকৰাকৈয়ে যে দেশ ভ্ৰমণ কৰিব পাৰি, সেই বাৰ্তা সমাজত দাঙি ধৰিবলৈ তাজ আলমে এই সাহসী আৰু ব্যতিক্ৰমী যাত্ৰা আৰম্ভ কৰিছে।
আশ্চৰ্যজনকভাৱে, এই দীঘলীয়া ভ্ৰমণত যাতায়ত, খোৱা-বোৱা আৰু নিশা থকাৰ ব্যৱস্থাৰ বাবে তেওঁ এটকাও খৰচ কৰিবলগীয়া হোৱা নাই। যাত্ৰাপথত প্ৰতিদিনেই কোনোবা নহয় কোনোবা সুহৃদয়বান ব্যক্তিৰ আতিথ্য আৰু সহায়-সহযোগিতা লাভ কৰি আহিছে তাজ আলমে।
এই অভিজ্ঞতাৰ পৰা অনুপ্ৰাণিত হৈ যুৱকজনে মন্তব্য কৰে যে যান্ত্ৰিকতা আৰু ব্যস্ততাৰে ভৰা আজিৰ পৃথিৱীখনত মানৱতা এতিয়াও জীয়াই আছে আৰু মানুহৰ মাজত সহানুভূতি তথা আতিথ্যশীলতাৰ অভাৱ নাই।