ডিজিটেল ডেস্ক : অৱশেষত জলন্ধৰৰ পৰা মাজুলী অভিমুখে যাত্রা আৰম্ভ কৰিলে আউনীআটী সত্ৰৰ অধিকাৰ ড° পীতাম্বৰ দেৱ গোস্বামীৰ সপোন আৰু পৰিকল্পনাৰ ফচল দুমহলীয়া পর্যটক বাছ 'পুষ্পক'য়ে। মাজুলীৰ পৰ্যটন ক্ষেত্ৰখনক নতুন মাত্ৰা প্ৰদানৰ লক্ষ্যৰে গ্ৰহণ কৰা এই বিশেষ উদ্যোগে দ্বীপ জিলাখনৰ পৰ্যটন ক্ষেত্ৰখনত এক নতুন সম্ভাৱনাৰ বাট মুকলি কৰাৰ আশা কৰা হৈছে।
উল্লেখযোগ্য যে লণ্ডন ভ্ৰমণৰ সময়ত দুমহলীয়া পর্যটক বাছত ভ্ৰমণ কৰাৰ অভিজ্ঞতাৰ পৰাই সত্ৰাধিকাৰ ড° পীতাম্বৰ দেৱ গোস্বামীৰ মনত মাজুলীৰ বাবেও এনে এখন বাছৰ পৰিকল্পনাই পোখা মেলিছিল। মাজুলীৰ প্রাকৃতিক সৌন্দর্য, ঐতিহ্য-পৰম্পৰা আৰু পৰ্যটনস্থলীসমূহ দেশ-বিদেশৰ পৰ্যটকৰ সন্মুখত অধিক আকৰ্ষণীয় ৰূপত তুলি ধৰাৰ উদ্দেশ্যে এই পৰিকল্পনা গ্ৰহণ কৰা হৈছিল।
জলন্ধৰত নিৰ্মাণ সম্পূৰ্ণ হোৱা বাছখনৰ যাত্ৰা আৰম্ভ হোৱাৰ লগে লগে সত্ৰাধিকাৰৰ এই দীৰ্ঘদিনীয়া পৰিকল্পনা বাস্তৱ ৰূপ লাভৰ দিশে আগবাঢ়িছে। অহা ২৫ নৱেম্বৰত আউনীআটী সত্ৰৰ পৰা বাছখনৰ সেৱা আনুষ্ঠানিকভাৱে মুকলি কৰা হ'ব।
মাজুলীৰ পৰ্যটন ক্ষেত্ৰৰ বাবে এই বিশেষ সংযোজনক লৈ ইতিমধ্যে উৎসুকতাৰ সৃষ্টি হৈছে।
উৎস: দৈনিক জনমভূমি