সৰুপথাৰত খৰাঙৰ কৱলত কৃষক, বিকল জলসিঞ্চন ব্যৱস্থাক লৈ ক্ষোভ

গোলাঘাট, ১৮ জুলাই: বৰ্ষাকাল আনুষ্ঠানিকভাৱে আৰম্ভ হোৱাৰ পিছতো গোলাঘাট জিলাৰ সৰুপথাৰ মহকুমাৰ কৃষকসকলে এতিয়াও বৰষুণৰ বাবে উদ্বিগ্নতাৰে অপেক্ষা কৰিছে। সেউজীয়া ধাননি পথাৰৰ পৰিৱৰ্তে মহকুমাটোৰ বিস্তীৰ্ণ কৃষিভূমি এতিয়াও শুকান হৈ আছে, মাটি ফাট মেলা দৃশ্যই অঞ্চলটোত সৃষ্টি হোৱা গুৰুতৰ খৰাং পৰিস্থিতিৰ কথাকে সূচাইছে।

প্ৰাপ্ত তথ্য অনুসৰি, দীৰ্ঘদিনীয়া শুষ্ক বতৰৰ বাবে মহকুমাটোৰ ৫০,০০০ হেক্টৰতকৈও অধিক কৃষিভূমি প্ৰভাৱিত হৈছে। হতাশাগ্ৰস্ত কৃষকসকলে অভিযোগ কৰিছে যে কৰ্তৃপক্ষলৈ বাৰে বাৰে আহ্বান জনোৱাৰ পিছতো তেওঁলোকে কোনো সুফল পোৱা নাই। কৃষকসকলে জানিবলৈ দিয়া মতে, যোৱা বছৰো তেওঁলোকে একেই পৰিস্থিতিৰ সন্মুখীন হৈছিল, কিন্তু চৰকাৰে কোনো ফলপ্ৰসূ ব্যৱস্থা গ্ৰহণ কৰাত ব্যৰ্থ হৈছে।

এজন কৃষকে কয়, "এইটো অত্যন্ত দুৰ্ভাগ্যজনক। আমাৰ ধানৰ পুলিবোৰ ইতিমধ্যে শুকাই গৈছে আৰু প্ৰায় জ্বলি গৈছে। আমি শুনিছো যে বৰ্তমানৰ জলসিঞ্চন ব্যৱস্থাটো সঠিকভাৱে কাম কৰা নাই। আমি চৰকাৰক আমাৰ গাঁওসমূহত উপযুক্ত জলসিঞ্চন ব্যৱস্থা স্থাপন কৰিবলৈ অনুৰোধ জনাইছো।"

সৰুপথাৰ জলসিঞ্চন বিভাগৰ এজন জ্যেষ্ঠ বিষয়াই এই কথা নিশ্চিত কৰিছে যে মহকুমাটোত ৩৬টা বৃহৎ আৰু সৰু জলসিঞ্চন আঁচনি থকা স্বত্বেও এই পাম্পসমূহ চলোৱাৰ বাবে কোনো অপাৰেটৰক আনুষ্ঠানিকভাৱে নিযুক্তি দিয়া হোৱা নাই। যাৰ ফলত খৰাঙৰ মাজতো অঞ্চলটোৰ কৃষকসকলে চৰকাৰী জলসিঞ্চন ব্যৱস্থাৰ পৰা কোনো ধৰণৰ সহায় পোৱা নাই। কৃষকসকলে চৰকাৰক শীঘ্ৰেই এই ক্ষেত্ৰত ব্যৱস্থা গ্ৰহণ কৰি জলসিঞ্চন ব্যৱস্থা কাৰ্যক্ষম কৰিবলৈ দাবী জনাইছে।