ডিজিটেল ডেস্কঃ স্বতন্ত্ৰ আৰু সাৰ্বভৌম পেলেষ্টাইন ৰাষ্ট্ৰ স্থাপনৰ দাবী ইজৰাইলে মানি নলয়। প্ৰধানমন্ত্ৰী বেঞ্জামিন নেতানিয়াহুৰ চৰকাৰে বৃহস্পতিবাৰে দেশৰ বিধায়িনী দল নেচেটত এই প্ৰস্তাৱ আনুষ্ঠানিকভাৱে গৃহীত কৰে। এই প্ৰস্তাৱৰ সপক্ষে ৬৮টা ভোট আৰু বিধেয়কখনৰ বিৰোধিতাত মাত্ৰ ৯টা ভোট।
তাৎপৰ্যপূৰ্ণভাৱে নেতানিয়াহুৰ লিকুড দলৰ নেতৃত্বত সোঁপন্থী শাসকীয় মিত্ৰজোঁটৰ লগতে মধ্যপন্থী বিৰোধী শিবিৰেও পেলেষ্টাইন বিৰোধী প্ৰস্তাৱক সমৰ্থন কৰিছিল। আনকি, ‘উদাৰবাদী নেতা’ নামেৰে পৰিচিত বেনি গেণ্টেঞ্জৰ দল ‘নেচনেল ইউনিটি’ৰ নেচেট সদস্যসকলো এই তালিকাত আছে। একাংশ কূটনৈতিক পৰ্যবেক্ষকৰ মতে গাজা যুদ্ধত ইজৰাইলৰ এই পদক্ষেপে শান্তিৰ সম্ভাৱনা আৰু অধিক অনিশ্চিত কৰি তুলিছে।
প্ৰসংগক্ৰমে বিশ্বৰ বেছিভাগ দেশেই ইতিমধ্যে পেলেষ্টাইনক পৃথক ৰাষ্ট্ৰ হিচাপে স্বীকৃতি দিছে। যোৱা মে’ মাহৰ আৰম্ভণিতে ৰাষ্ট্ৰসংঘৰ সাধাৰণ পৰিষদত ১৯৩খন দেশৰ ভিতৰত ১৪৩খন দেশে পেলেষ্টাইনক সদস্য ৰাষ্ট্ৰ হিচাপে গঢ়ি তুলিবলৈ ভোটদান কৰিছিল। তেতিয়ালৈকে পূৰ্বৰ ছোভিয়েট ইউনিয়ন ব্লক আৰু ভাৰতৰ দৰে অসংলগ্ন দেশসমূহে পেলেষ্টাইনক ‘ৰাষ্ট্ৰ’ হিচাপে স্বীকৃতি দিছিল।
Continue Reading
