ৰাজ্যত পঞ্জীয়নকৃত নিবনুৱাৰ সংখ্যা ১৫,৪৩,৩৫০জন

ডিজিটেল ডেস্ক : অসমত পঞ্জীয়নকৃত নিবনুৱাৰ সংখ্যা কিমান। ইয়াকে লৈ বিভিন্ন সময়ত বিভিন্ন চর্চা চলি থকাৰ সময়তে কালি ৰাজ্য চৰকাৰে বিধানসভাত ঘোষণা কৰিছে যে ৰাজ্যত যোৱা ৩০ জুনলৈকে পঞ্জীয়নকৃত নিবনুৱাৰ সংখ্যা হৈছে ১৫,৪৩,৩৫০জন। এনে পৰিস্থিতিত কর্ম সংস্থাপন বিচাৰি ৰাজ্যৰ লাখ লাখ নিবনুৱা যুৱক-যুৱতী বহিঃৰাজ্যলৈ গৈছে। কিন্তু বহিঃৰাজ্যতো তেওঁলোক নিৰাপদ নহয়। 

প্রতিদিনেই বহিঃৰাজ্যত মৃত্যু হৈছে অসমীয়া যুৱক-যুৱতীৰ। খোদ ৰাজ্যৰ গৃহ আৰু ৰাজনৈতিক বিভাগৰ তথ্য মতে, ২০২৫ চনৰ ১ অক্টোবৰ পৰা আৰম্ভ কৰা শ্ৰদ্ধাঞ্জলি আঁচনিৰ অধীনত যোৱা ১ জুলাইলৈকে বহিঃৰাজ্যত কৰ্মৰত ৩৫৪জন বিভিন্ন ৰোগ আৰু পথ দুর্ঘটনাত পতিত শ্রমিক আৰু অধ্যয়নৰত ছাত্ৰৰ মৃতদেহ গৃহ ৰাজ্যলৈ চৰকাৰী খৰচত অনা হৈছে। ইয়াৰ পৰাই স্পষ্ট হৈ পৰিছে বহিঃৰাজ্যলৈ যোৱা অসমৰ লোকসকলৰ অৱস্থা কি? 

ইফালে ৰাজ্যখনত থকা পঞ্জীয়নভুক্ত শ্ৰমিকৰ সংখ্যা হৈছে ৭৮,৭৩,৬৫৮জন। ইয়াৰ ভিতৰত কাৰিকৰীভাৱে অক্ষম তথা অদক্ষ শ্রমিকৰ দৈনিক মজুৰি হৈছে ৪০৫.৫২ টকা। একেদৰে সাধাৰণভাৱে দক্ষ শ্রমিকে ৪৭১.৪৪ টকা। কাৰিকৰীভাৱে দক্ষ শ্রমিক, কেৰাণী শ্রমিকে ৫৮৯.৩৪ টকা, কাৰিকৰীভাৱে অতি দক্ষ শ্রমিকে ৭৫৮.০৮ টকা লাভ কৰি আহিছে। আনহাতে, ঠিকাদাৰৰ দ্বাৰা নিয়োজিত শ্রমিকসকলৰ বাবে দৈনিক মজুৰি হৈছে ক্ৰমে কাৰিকৰীভাৱে অক্ষম, অদক্ষ শ্রমিকৰ ৩৯৫.০০ টকা, সাধাৰণভাৱে দক্ষ শ্রমিকৰ ৪৫৮.০ টকা, কাৰিকৰীভাৱে দক্ষ শ্রমিক, কেৰাণী শ্ৰমিকৰ ৫৫৩.০০ টকা, কাৰিকৰীভাৱে দক্ষ শ্রমিক, নন আই টি আইৰ ৫৮৫.০০ টকা, কাৰিকৰীভাৱে অতি দক্ষ শ্ৰমিকৰ দৈনিক মজুৰি হৈছে ৭২৭.০০ টকা। 

কালি সদনত এই তথ্য প্রকাশ কৰিছে শ্রম কল্যাণ বিভাগৰ মন্ত্ৰী ৰামেশ্বৰ তেলীয়ে। কিন্তু তেওঁ নিজৰ বিভাগৰ অধীনত শ্রমিকসকলক নিজা ৰাজ্যত নিয়োজিত কৰাৰ বাবে কোনো আঁচনি বা ব্যৱস্থা নাই বুলিহে প্রকাশ কৰিছে।

 উৎস: দৈনিক জনমভূমি