ডিজিটেল ডেস্কঃ ফ্ৰান্সৰ নেচনেল ইনষ্টিটিউট অৱ হেলথ এণ্ড মেডিকেলে চলোৱা এক গৱেষণামূলক অধ্যয়নৰ জৰিয়তে জানিব পৰা অনুসৰি দেশখনত সম্প্ৰতি প্ৰতি চাৰিজন ব্যক্তিৰ এজনে শ্ৰৱণশক্তিৰ সমস্যাত আক্ৰান্ত হৈছে। শ্ৰৱণশক্তিৰ সমস্যাত আক্ৰান্ত লোকসকল ক্ৰমে শ্ৰৱণশক্তিহীন হবলৈ ধৰিছে। সম্প্ৰতি ফ্ৰান্সৰ মুঠ জনসংখ্যাৰ ২৫ শতাংশ লোক শ্ৰৱণশক্তিৰ সমস্যাত ভুগিছে। এক সমীক্ষাত ১৮-৭৫ বছৰীয়া মুঠ ১,৮৬,৪৬০ জন লোকক সামৰি লোৱা হৈছিল।
অধ্যয়নটোৰ জৰিয়তে গৱেষকে জানিব পাৰিলে যে মূলত জীৱনশৈলী, সামাজিক বিচ্ছিন্নতা, হতাশা আৰু উচ্চগ্ৰামৰ শব্দৰ পৰিৱেশত বাস কৰাৰ ফলত এইসকল লোক শ্ৰৱণশক্তি হ্ৰাসজনিত সমস্যাত আক্ৰান্ত হৈছিল। একাংশ লোকে মধুমেহ ৰোগৰ পৰিণতিতো শ্ৰৱণশক্তিৰ সমস্যাত ভুগিছে। বিশ্ব স্বাস্থ্য সংস্থাৰ তথ্য অনুসৰি, বিশ্বত প্ৰায় ১৫০ কোটি লোকে নানা ধৰণৰ শ্ৰৱণশক্তি হ্ৰাসৰ সমস্যাত আক্ৰান্ত হৈছে।
আন্তৰ্জাতিক স্বাস্থ্য সংস্থাটোৰ মতে, ২০৫০ বৰ্ষলৈকে বিশ্বত শ্ৰৱণশক্তিৰ সমস্যাত ভোগা লোকৰ সংখ্যা ২৫০ কোটিলৈ বৃদ্ধিৰ শংকা আছে। বিশ্ব স্বাস্থ্য সংস্থাই কয় যে হেডফোন আৰু য়েৰফোনৰ অত্যধিক ব্যৱহাৰৰ পৰিণতিত বিশ্বজুৰি মানুহৰ মাজত শ্ৰৱণশক্তি হ্ৰাসৰ নানা সমস্যাই ভয়াৱহ ৰূপ ধাৰণ কৰিছে। উচ্চগ্ৰামৰ সংগীত যেনে ডিজেৰ সংগীত উপভোগৰ ফলতো মানুহৰ শ্ৰৱণশক্তিত কুপ্ৰভাৱ পৰিছে।
Continue Reading
