ডিজিটেল ডেস্ক : যুদ্ধ-বিৰতি ভংগ কৰি ইজৰাইলে গাজাত আক্রমণ চলোৱাৰ ৭২ ঘণ্টাৰ ভিতৰত প্ৰায় ৬০০ পেলেষ্টাইনী লোকক হত্যা কৰিছে। গাজা মিডিয়া অফিচে সদৰী কৰা অনুসৰি, ইজৰাইলে ইয়াৰ বিমান আক্ৰমণ আৰু স্থল আক্ৰমণ গাজাত বৃদ্ধি কৰি থকাৰ ফলত মৃতকৰ সংখ্যা বাঢ়িয়েই আছে। গাজাৰ দক্ষিণৰ চহৰ ৰাফাত ইজৰাইলী সেনাই স্থল আক্রমণ বৃদ্ধি কৰিছে।
তদুপৰি, পেলেষ্টাইনৰ উত্তৰত থকা বেইট লাহিয়া চহৰতো ইজৰাইলে আক্ৰমণৰ সূচনা কৰিছে। বিগত ১৮ মার্চত ইজৰাইলে গাজাত স্থল আক্ৰমণ আৰম্ভ কৰিছিল। ইফালে, ইজৰাইলৰ তৰফৰ পৰা হামাছক সম্পূৰ্ণৰূপে নির্মূল কৰাৰ হুংকাৰ দিয়া হৈছে।
শেহতীয়া স্থল আক্ৰমণত ইজৰাইলে গাজাত ২০০ শিশুসহ প্রায় ৬০০ লোকক হত্যা কৰিছে। আনহাতে, টেল আভিভৰ পৰা পোৱা বাতৰি অনুসৰি, হামাছে ইজৰাইলৰ আক্ৰমণৰ প্ৰতিশোধ কল্পে টেল আভিভলৈ তিনিটা ৰকেট নিক্ষেপ কৰি আক্ৰমণৰ সূচনা কৰে। ইজৰাইলে ইয়াৰ দুটা ৰকেটৰ আক্ৰমণ প্রতিহত কৰিছে আৰু এটা ৰকেট পৰিত্যক্ত অঞ্চলত পেলাইছে বুলি সদৰী কৰিছে ৷
উৎসঃ দৈনিক জনমভূমি
Continue Reading
