ডিজিটেল ডেস্কঃ ভাৰতীয় অনন্য পৰিচয় প্ৰাধিকৰণে (UIDAI) আধাৰ কাৰ্ডক লৈ এক গুৰুত্বপূৰ্ণ আপডেট জাৰী কৰিছে। শেহতীয়া এক নিৰ্দেশনাত স্পষ্ট কৰি দিয়া হৈছে যে আধাৰ কাৰ্ড এতিয়াৰে পৰা জন্মৰ তাৰিখৰ (Date of Birth) বৈধ প্ৰমাণপত্ৰ হিচাপে গণ্য কৰা নহ’ব। আধাৰ কেৱল পৰিচয় আৰু ঠিকনাৰ প্ৰমাণ হিচাপেহে ব্যৱহাৰযোগ্য হ’ব।
কেৱল পৰিচয়ৰ প্ৰমাণ: UIDAI-ৰ মতে আধাৰ কাৰ্ড এজন ব্যক্তিৰ পৰিচয় সাব্যস্ত কৰাৰ বাবে এক শক্তিশালী মাধ্যম, কিন্তু ই জন্মৰ তাৰিখৰ চৰকাৰী প্ৰমাণ নহয়।
তথ্যৰ উৎস: আধাৰ কাৰ্ডত থকা জন্মৰ তাৰিখ আবেদনকাৰীয়ে পঞ্জীয়নৰ সময়ত দিয়া তথ্যৰ ওপৰত ভিত্তি কৰিহে লিখা হয়। যিবোৰ ক্ষেত্ৰত সঠিক নথিপত্ৰ নাথাকে, তাত আবেদনকাৰীৰ আনুমানিক বয়সৰ ওপৰত ভিত্তি কৰি চিষ্টেমে ১ জানুৱাৰীক জন্মৰ তাৰিখ হিচাপে ধৰি লয়। গতিকে ই সদায় সঠিক নহ'বও পাৰে।
অৰ্হতা: এতিয়াৰে পৰা জন্মৰ তাৰিখৰ প্ৰমাণৰ বাবে স্কুল চাৰ্টিফিকেট (Matric Admit/Certificate), পাছপ’ৰ্ট অথবা পৌৰ নিগম/পঞ্চায়তৰ পৰা জাৰী কৰা জন্মৰ প্ৰমাণপত্ৰহে (Birth Certificate) বাধ্যতামূলক হ’ব।
প্ৰমাণপত্ৰ হিচাপে আধাৰৰ স্থিতি:
UIDAI-এ পুনৰ দোহাৰিছে যে আধাৰ কাৰ্ডৰ সকলো সংস্কৰণ— যেনে শাৰীৰিক কাৰ্ড, ই-আধাৰ, মাস্কড আধাৰ (Masked Aadhaar) আৰু অফলাইন XML— পূৰ্বৰ দৰেই পৰিচয় আৰু ঠিকনাৰ প্ৰমাণ (Identity and Address Proof) হিচাপে বৈধ হৈ থাকিব।
বিভিন্ন বিভাগৰ বাবে নিৰ্দেশনা:
প্ৰাধিকৰণে সকলো আধাৰ ব্যৱহাৰকাৰী সংস্থা (AUA/KUA) আৰু চৰকাৰী বিভাগসমূহক জনাইছে যে তেওঁলোকে জন্মৰ তাৰিখৰ সত্যাপনৰ বাবে আধাৰৰ সলনি অন্য নিৰ্ভৰযোগ্য নথিপত্ৰৰ সহায় ল'ব লাগে। অৱশ্যে চৰকাৰী ৰাজসাহায্য (Subsidy) বা কল্যাণমূলক আঁচনিৰ বাবে আধাৰ সংযোগ পূৰ্বৰ দৰেই চলি থাকিব।
যদি আপুনি কোনো চৰকাৰী বা বেচৰকাৰী কামত জন্মৰ তাৰিখৰ প্ৰমাণ দিবলগীয়া হয়, তেন্তে কেৱল আধাৰ কাৰ্ডৰ ওপৰত নিৰ্ভৰ নকৰি বৈধ জন্মৰ প্ৰমাণপত্ৰ লগত ৰখাটো জৰুৰী।
Continue Reading
