ডিজিটেল ডেস্কঃ দক্ষিণ ভাৰতীয় ছবি জগতৰ জনপ্ৰিয় তাৰকা বিজয় দেৱৰাকোণ্ডা আৰু ৰশ্মিকা মান্দান্নাৰ বিয়াৰ উৰাবাতৰিয়ে অৱশেষত লাভ কৰিলে পূৰ্ণতা।
বহু বছৰ ধৰি চলা জল্পনা-কল্পনাৰ অন্ত পেলাই এই তাৰকা যুটীটোৱে নিজৰ বিবাহৰ কথা আনুষ্ঠানিকভাৱে ঘোষণা কৰিছে।
সোমবাৰে পুৱা এই প্ৰেমিক যুগলক হায়দৰাবাদ বিমানবন্দৰত দেখা গ’ল, য’ৰ পৰা তেওঁলোক নিজৰ বিবাহ অনুষ্ঠানৰ বাবে ৰাজস্থানৰ উদয়পুৰলৈ ৰাওনা হয়।
উদয়পুৰলৈ যোৱাৰ পূৰ্বে বিজয় আৰু ৰশ্মিকাই ছচিয়েল মিডিয়াত এটা আৱেগিক পোষ্ট শ্বেয়াৰ কৰে। অনুৰাগীয়ে তেওঁলোকক মৰমেৰে দিয়া 'VIROSH' (বিৰোশ) নামটোৰ প্ৰতি সন্মান জনাই তেওঁলোকে এই বিশেষ দিনটোক ‘দ্য ৱেডিং অফ বিৰোশ’ (The Wedding of Virosh) বুলি অভিহিত কৰিছে। তেওঁলোকে অনুৰাগীসকলক ধন্যবাদ জনাই লিখে যে তেওঁলোকৰ মৰমৰ বাবেই আজি এই সম্পৰ্কই পূৰ্ণতা পাইছে।
প্ৰাপ্ত খবৰ অনুসৰি, অহা ২৬ ফেব্ৰুৱাৰীত উদয়পুৰত এক অতি ব্যক্তিগত আৰু অন্তৰংগ পৰিৱেশত দুয়ো বিবাহপাশত আৱদ্ধ হ’ব। এই অনুষ্ঠানত কেৱল পৰিয়ালৰ লোক আৰু ঘনিষ্ঠ বন্ধু-বান্ধৱীহে উপস্থিত থাকিব। ইয়াৰ পিছতে ৪ মাৰ্চত হায়দৰাবাদত এখন বিশাল অভ্যৰ্থনা অনুষ্ঠান অনুষ্ঠিত হোৱাৰ সম্ভাৱনা আছে।
২০১৮ চনত ‘গীতা গোবিন্দম’ ছবিৰ জৰিয়তে প্ৰথমবাৰৰ বাবে বিজয় আৰু ৰশ্মিকাই একেলগে কাম কৰিছিল। তাৰ পিছত ‘ডিয়েৰ কমৰেড’ ছবিত তেওঁলোকৰ অন-স্ক্ৰীণ কেমেষ্ট্ৰীয়ে দৰ্শকক মন্ত্ৰমুগ্ধ কৰিছিল। তেতিয়াৰ পৰাই তেওঁলোকৰ প্ৰেমৰ সম্পৰ্কক লৈ চৰ্চা চলি আছিল, যি এতিয়া বিবাহৰ ৰূপ ল’বলৈ গৈ আছে।
বিমানবন্দৰত দুয়োৰে মুখত বিৰিঙা হাঁহিয়ে স্পষ্ট কৰি দিছে যে তেওঁলোক এই নতুন জীৱনক লৈ অতিশয় উৎসাহিত। অনুৰাগীসকলেও এতিয়া অধীৰ আগ্ৰহেৰে তেওঁলোকৰ বিবাহৰ ফটোসমূহলৈ অপেক্ষা কৰিছে।
Continue Reading
