মহাকাশ বিজ্ঞানত নতুন ইতিহাস: চন্দ্ৰৰ কক্ষপথ ভ্ৰমণ কৰি পৃথিৱীলৈ সুৰক্ষিত প্ৰত্যাৱৰ্তন নাছাৰ ৪ মহাকাশচাৰীৰ

ডিজিটেল ডেস্ক: সুদীর্ঘ ১০ দিনীয়া এক ঐতিহাসিক অভিযানৰ সফল সামৰণি মাৰি পৃথিৱীলৈ উভতি আহিল নাছাৰ 'আৰ্টেমিছ-২' (Artemis II) মিছনৰ চাৰিজন মহাকাশচাৰী। শনিবাৰে নিশা তেওঁলোকৰ মহাকাশযান 'ওৰিয়ন' (Orion) কেলিফৰ্ণিয়াৰ উপকূলৰ ওচৰৰ প্ৰশান্ত মহাসাগৰত সুৰক্ষিতভাৱে অৱতৰণ কৰে। ১৯৭২ চনৰ এপোলো মিছনৰ পাছত এয়াই আছিল মানৱবাহী প্ৰথমটো চন্দ্ৰ অভিযান।

যোৱা ১ এপ্ৰিলত ফ্ল’ৰিডাৰ কেপ কানাভেৰালৰ পৰা এছ.এল.এছ. (SLS) ৰকেটৰ জৰিয়তে এই অভিযান আৰম্ভ হৈছিল। এই ১০ দিনীয়া ভ্ৰমণত মহাকাশচাৰীসকলে কেইবাটাও গুৰুত্বপূৰ্ণ অভিলেখ গঢ়িবলৈ সক্ষম হয়:

মুঠ দূৰত্ব: প্ৰায় ১১.১৬ লাখ কিলোমিটাৰ।

সৰ্বাধিক দূৰত্ব: পৃথিৱীৰ পৰা ৪,০৬,৭৭১ কিলোমিটাৰ দূৰলৈ গৈ মহাকাশচাৰীসকলে চন্দ্ৰৰ 'ফাৰ চাইড' (Far Side) অতিক্ৰম কৰে।

বিৰল কৃতিত্ব: এই মিছনতে প্ৰথমবাৰৰ বাবে এগৰাকী মহিলা, এজন কৃষ্ণাংগ ব্যক্তি আৰু এজন অ-আমেৰিকান নাগৰিকে চন্দ্ৰৰ কক্ষপথত ভ্ৰমণ কৰে।

প্ৰশান্ত মহাসাগৰত অৱতৰণ কৰাৰ আগৰ ১৩ মিনিট সময় আছিল আটাইতকৈ ভয়াৱহ। বায়ুমণ্ডলত প্ৰৱেশৰ সময়ত ওৰিয়ন কেপচুলটোৰ গতিবেগ আছিল প্ৰতি ঘণ্টাত প্ৰায় ৩৯,০০০ কিলোমিটাৰ। তীব্ৰ ঘৰ্ষণৰ ফলত কেপচুলটোৰ বাহিৰৰ উষ্ণতা প্ৰায় ২৭৬০ ডিগ্ৰী চেলচিয়াছলৈ বৃদ্ধি পাইছিল। ইয়াৰ ফলত সৃষ্টি হোৱা প্লাজমা তৰপৰ বাবে মহাকাশচাৰীসকলৰ সৈতে নাছাৰ যোগাযোগ প্ৰায় ৬ মিনিটৰ বাবে সম্পূৰ্ণ বিচ্ছিন্ন হৈ পৰিছিল। অৱশেষত কেইবাটাও পেৰাচুটৰ সহায়ত যানখনৰ গতিবেগ হ্ৰাস কৰি ইয়াক সাগৰত অৱতৰণ কৰোৱা হয়।

মহাকাশচাৰী দলটোৰ পৰিচয়

এই ঐতিহাসিক যাত্ৰাত অংশ লোৱা চাৰিজন সাহসী মহাকাশচাৰী হ’ল:

ৰীড ৱাইজমেন (Commander): আমেৰিকান মহাকাশচাৰী।

ভিক্টৰ গ্লভাৰ (Pilot): চন্দ্ৰ অভিযানত অংশ লোৱা প্ৰথমজন কৃষ্ণাংগ ব্যক্তি।

ক্ৰিস্টিনা কচ (Mission Specialist): চন্দ্ৰৰ কক্ষপথলৈ যোৱা প্ৰথমগৰাকী মহিলা।

জেৰেমি হেনছন (Mission Specialist): কানাডিয়ান মহাকাশচাৰী (প্ৰথম অ-আমেৰিকান)।

আৰ্টেমিছ-২ মিছনৰ এই অভাবনীয় সফলতাই নাছাৰ ভৱিষ্যত পৰিকল্পনাক অধিক শক্তিশালী কৰি তুলিছে। নাছাৰ পৰৱৰ্তী লক্ষ্য হৈছে আৰ্টেমিছ-৩, যাৰ জৰিয়তে ২০২৮ চনত দীৰ্ঘদিনৰ বিৰতিৰ পাছত পুনৰ চন্দ্ৰৰ মাটিত মানুহ নমোৱা হ’ব। এই অভিযানেই ভৱিষ্যতে মঙ্গল গ্ৰহলৈ মানুহ পঠোৱাৰ পথ প্ৰশস্ত কৰিব বুলি বিজ্ঞানীসকলে আশা প্ৰকাশ কৰিছে।