৫৪ বছৰৰ পাছত যাত্ৰা কৰিব 'নাছা'ৰ আর্টেমিছ-২ মহাকাশ যান, কাইলৈ চন্দ্রলৈ যাব ৪ মহাকাশচাৰী

ডিজিটেল ডেস্ক: চন্দ্ৰত ৫৪ বছৰৰ পাছত মানৱ অভিযানৰ বাবে সাজু হৈছে আমেৰিকাৰ মহাকাশ গৱেষণা সংস্থা 'নাছা'। ১৯৭২ চনৰ পাছত প্ৰথমবাৰৰ বাবে চাৰিজন মহাকাশচাৰী চন্দ্ৰৰ কক্ষপথত প্ৰৱেশ কৰিব। 

নাছাই প্রকাশ কৰা মতে আর্টেমিছ-২ অভিযান সম্পূর্ণৰূপে সাজু হৈ উঠিছে। কোনো ধৰণৰ কাৰিকৰী সমস্যা নাই। অহা ১ এপ্রিলত আর্টেমিছ-২ চন্দ্ৰ অভিমুখে ৰাওনা হ'ব। ইয়াত থকা চাৰিজন মহাকাশচাৰীয়ে চন্দ্ৰৰ চৌপাশে পাক মাৰিব আৰু তাৰ পাছত পুনৰ পৃথিৱীলৈ উভতি আহিব। ইতিমধ্যে চাৰিজন মহাকাশচাৰী ক্রমে কমাণ্ডাৰ ৰীড ৱাইজমেন, পাইলট ভিক্টৰ গ্ল'ভাৰ, ক্রিষ্টিনা কোচ আৰু কানাডাৰ জেৰেমী হেমছেন চূড়ান্ত পৰ্যায়ৰ প্ৰস্তুতিত ব্যস্ত হৈ পৰিছে। তেওঁলোক টি-৩৭ জেট বিমানেৰে কেনেডী মহাকাশ কেন্দ্রত উপস্থিত হৈছে। তেওঁলোকে তাৰ পৰা বিশাল এছ এল এছ ৰকেটত উঠি চন্দ্ৰ অভিমুখে উৰা মাৰিব। এই অভিযান দহ দিনীয়া হ'ব। নাছাই প্রকাশ কৰা মতে এই অভিযানত মহাকাশচাৰী কেইজনে চন্দ্ৰপৃষ্ঠত নানামে, ইয়াৰ পৰিৱৰ্তে তেওঁলোক চন্দ্ৰৰ কক্ষপথত প্ৰৱেশ কৰিব আৰু চন্দ্ৰৰ চৌদিশে পৰিভ্ৰমণ কৰিব। নাছাৰ মতে ই হ'ব আৰ্টেমিছ অভিযানৰ প্ৰথমটো মানৱসহ অভিযানৰ পৰীক্ষা। 

আনহাতে চন্দ্ৰৰ কাষলৈ যোৱা ভিক্টৰ গ্ল'ভাৰ প্ৰথমজন অশ্বেত মহাকাশচাৰী হ'ব। একেদৰে ক্ৰিষ্টিনা চন্দ্ৰৰ কক্ষপথত প্ৰৱেশ কৰা প্ৰথমগৰাকী মহিলা আৰু জেৰেমী হেনথেন প্রথমজন অনা-আমেৰিকান হ'ব। জেৰেমীৰ বাদে আনকেইগৰাকীৰ পূৰ্বৰ মহাকাশ অভিযানৰ অভিজ্ঞতা আছে। মহাকাশ যাত্রী কেইজন অৰিয়ন কেপছুলত উঠি চন্দ্ৰৰ কক্ষপথলৈ ৰাওনা হ'ব। তেওঁলোকে এই অভিযানত অৰিয়নৰ লাইফ ছাপর্ট ছিষ্টেম, নেভিগেশ্যন, যোগাযোগ আৰু হিট শ্বিল্ডৰ পৰীক্ষা কৰিব। কমাণ্ডাৰ ৱাইজমেনে কয় যে এই অভিযানৰ উদ্দেশ্য কেৱল চন্দ্ৰৰ কাষলৈ যোৱাই নহয়, নাছাৰ কেইবা কোটি ডলাৰৰ আর্টেমিছ কাৰ্যসূচীৰ প্রকৃত পৰীক্ষা। এতিয়া যদি সকলো ঠিকে-ঠাকে থাকে তেতিয়া পৰৱৰ্তী অভিযানবোৰত চন্দ্ৰত অৱতৰণ কৰা আৰু তাত দীঘলীয়া সময় থকাটো সহজ হৈ পৰিব। উল্লেখযোগ্য যে নাছা আর্টেমিছ অভিযানৰ প্ৰধান লক্ষ্য হ'ল চন্দ্ৰত মানুহৰ স্থায়ী বসতিস্থল স্থাপন কৰা আৰু তাৰ পাছত মঙল গ্রহত মানৱ অভিযান চলোৱা।

উৎসঃ দৈনিক জনমভূমি