দিল্লীত ভয়ংকৰ পথ দুৰ্ঘটনা: তীব্ৰবেগী বাহনৰ খুন্দাত ৪ যুৱকৰ কৰুণ মৃত্যু

ডিজিটেল ডেস্কঃ দেশৰ ৰাজধানী চহৰ দিল্লীত পুনৰ তীব্ৰবেগী বাহনৰ সন্ত্ৰাস। পৃথক পৃথক দুটা পথ দুৰ্ঘটনাত চাৰিজন যুৱকে প্ৰাণ হেৰুৱাব লগা হোৱা ঘটনাই অঞ্চলজুৰি চাঞ্চল্যৰ সৃষ্টি কৰিছে। দুয়োটা দুৰ্ঘটনাৰে মূল কাৰণ অত্যধিক গতি বুলি আৰক্ষীয়ে প্ৰাথমিক তদন্তত প্ৰকাশ কৰিছে।

প্ৰথমটো ঘটনা সংঘটিত হয় বাহ্যিক দিল্লীৰ মুকুন্দপুৰ ফ্লাইঅভাৰত। আৰক্ষীৰ তথ্য অনুসৰি, দেওবাৰে নিশা প্ৰায় ১১ বজাত দুজন যুৱকে আদৰ্শ নগৰৰ পৰা সংগম বিহাৰ অভিমুখে তীব্ৰবেগী বাইকখনেৰে গৈ আছিল। ফ্লাইঅভাৰৰ ওপৰত চালকজনে নিয়ন্ত্ৰণ হেৰুৱাই পেলোৱাত বাইকখনে প্ৰকাণ্ড দেৱালত খুন্দা মাৰে। খুন্দাৰ প্ৰচণ্ডতা ইমানেই বেছি আছিল যে এজন যুৱক ফ্লাইঅভাৰৰ পৰা তলৰ নলাত ছিটিকি পৰে। আৰক্ষীয়ে পিছত নলাৰ পৰা যুৱকজনৰ মৃতদেহ উদ্ধাৰ কৰে।

চিকিৎসালয়ৰ ৰিপৰ্ট অনুসৰি, দুৰ্ঘটনাৰ সময়ত যুৱক দুজন সুৰাসক্ত অৱস্থাত আছিল। তেওঁলোকে বন্ধুৰ ঘৰত পাৰ্টি কৰি উভতি অহাৰ পথতে এই শোকাবহ ঘটনাটো ঘটে।

আনহাতে, সোমবাৰে নিশা প্ৰায় ১০:৩০ বজাত সংঘটিত দ্বিতীয়টো দুৰ্ঘটনাত দুই সম্বন্ধীয় ভাতৃৰ মৃত্যু হয়। জানিব পৰা মতে, দুয়ো ভাতৃয়ে একেলগে আই পি এল (IPL) মেচ উপভোগ কৰি ঘৰলৈ উভতি আহিছিল। মৃত্যুৰ মাত্ৰ কেইমিনিটমান পূৰ্বে সৰু ভাইজনে দেউতাকলৈ ফোন কৰি আধা ঘণ্টাৰ ভিতৰত ঘৰ পাব বুলি জনাইছিল। কিন্তু ঘৰ পোৱাৰ পূৰ্বেই নিয়তিয়ে তেওঁলোকক থপিয়াই লৈ যায়।

ভলস্বা ডেইৰী থানাৰ আৰক্ষীয়ে এই সন্দৰ্ভত ভাৰতীয় ন্যায় সংহিতাৰ (BNS) ধাৰা ২৮১ আৰু ১০৬(১)ৰ অধীনত গোচৰ ৰুজু কৰিছে। দুৰ্ঘটনাৰ প্ৰকৃত কাৰণ আৰু কোনো প্ৰত্যক্ষদৰ্শী আছে নেকি জানিবলৈ আৰক্ষীয়ে সমীপৰ চিচিটিভি (CCTV) ফুটেজ পৰীক্ষা কৰি আছে।