ড° অশোক কুমাৰ লাহিড়ীক নিটি আয়োগৰ উপাধ্যক্ষৰূপে নিয়োগ

ডিজিটেল ডেস্ক: কেন্দ্ৰীয় চৰকাৰে শনিবাৰে নিটি আয়োগ পুনৰ গঠন কৰে। ড° অশোক কুমাৰ লাহিড়ীক নিটি আয়োগৰ উপাধ্যক্ষৰূপে নিয়োগ কৰাৰ উপৰি পাঁচজন পূর্ণকালীন সদস্যকো চৰকাৰে নিযুক্তি দিয়ে। 

ভাৰত চৰকাৰৰ দ্বাদশ মুখ্য অর্থনৈতিক উপদেষ্টা আৰু পঞ্চদশ বিত্ত আয়োগৰ এজন সদস্য ড° অশোক কুমাৰ লাহিড়ী বর্তমান পশ্চিম বংগ বিধানসভাৰ বালুঘাট সমষ্টিৰ বিধায়ক। তেওঁ ৩০ এপ্রিলত নিটি আয়োগৰ উপাধ্যক্ষৰ কাৰ্যভাৰ গ্ৰহণ কৰিব।

ইফালে নিটি আয়োগৰ নৱ-নিযুক্ত সদস্যসকলৰ ভিতৰত আছে অর্থনীতিবিদ কে ভি ৰাজু, এইছৰ সঞ্চালক এম শ্রীনিবাস তথা বিজ্ঞান আৰু প্ৰযুক্তি বিভাগৰ সচিব অভয় কৰণ্ডীকৰ। এই নিযুক্তিৰ কথা ঘোষণা কৰি প্ৰধানমন্ত্ৰী নৰেন্দ্ৰ মোদীয়ে লাহিড়ী আৰু নতুন পূৰ্ণকালীন সদস্যৰ কাৰ্যকাল ফলদায়ক হোৱাৰ আশা কৰে। 

উক্ত পাঁচজন সদস্যৰ ভিতৰত আন দুজন হৈছে বিজ্ঞানী গোবর্ধন দাস আৰু প্ৰাক্তন কেবিনেট সচিব ৰাজীৱ গৌবা। প্রধানমন্ত্রীয়ে আৰু কয় যে নিটি আয়োগ ভাৰতৰ নীতি ৰচনাৰ স্থাপত্যত এক গুৰুত্বপূৰ্ণ স্তম্ভ, যি সহযোগিতামূলক ফেডাৰেলিজম তথা সংস্কাৰ বৃদ্ধি কৰিছে। তেওঁ আৰু কয়, 'উদ্ভাৱনৰ বাবে তথা বিভিন্ন খণ্ডৰ দীর্ঘম্যাদী কৌশলগত চিন্তাৰ বাবে ই এক গতিশীল মঞ্চ।' উল্লেখযোগ্য যে প্রধানমন্ত্রী হৈছে নিটি আয়োগৰ অধ্যক্ষ।

উৎস: দৈনিক জনমভূমি