চন্দ্ৰত মানুহৰ বসতি: ইলন মাস্কৰ এক মহাকাংক্ষী পৰিকল্পনা

ডিজিটেল ডেস্কঃ মহাকাশ গৱেষণাৰ ক্ষেত্ৰত বিশ্বৰ অন্যতম ধনাঢ্য ব্যক্তি তথা স্পেচএক্স (SpaceX)ৰ মুৰব্বী ইলন মাস্কে পুনৰ এক চাঞ্চল্য্যকৰ ঘোষণাৰে বিশ্ববাসীক আচৰিত কৰি তুলিছে। মঙল গ্ৰহৰ পাছত এইবাৰ মাস্কৰ লক্ষ্য হৈছে পৃথিৱীৰ একমাত্ৰ উপগ্ৰহ চন্দ্ৰ। চন্দ্ৰত কেৱল বৈজ্ঞানিক গৱেষণাই নহয়, বৰঞ্চ এখন সম্পূৰ্ণ মানৱ চহৰ গঢ়ি তোলাৰ এক বৃহৎ পৰিকল্পনা তেওঁ হাতত লৈছে।

ইলন মাস্কৰ এই পৰিকল্পনাৰ কেন্দ্ৰবিন্দু হৈছে স্পেচএক্সৰ সৰ্ববৃহৎ ৰকেট 'ষ্টাৰশ্বিপ' (Starship)। মাস্কৰ মতে, এই শক্তিশালী ৰকেটখনৰ জৰিয়তে একেলগে বহুসংখ্যক যাত্ৰী আৰু চহৰ নিৰ্মাণৰ বাবে প্ৰয়োজনীয় গধুৰ সামগ্ৰী অতি কম খৰচতে চন্দ্ৰলৈ কঢ়িয়াই নিয়াটো সম্ভৱ হ’ব। এই ৰকেটখন পুনৰ ব্যৱহাৰযোগ্য হোৱাটোৱে এই অভিযানক অধিক বাস্তৱসন্মত কৰি তুলিব।

মাস্কৰ দীৰ্ঘম্যাদী লক্ষ্য হৈছে মানৱ জাতিক ‘বহু-গ্ৰহীয় প্ৰজাতি’ (Multi-planetary species) হিচাপে গঢ়ি তোলা। তেওঁৰ মতে পৃথিৱীত ভৱিষ্যতে আহিব পৰা যিকোনো সংকটৰ পৰা মানৱ সভ্যতা ৰক্ষা কৰিবলৈ মহাকাশত বিকল্প বাসস্থানৰ প্ৰয়োজন।

মঙল গ্ৰহলৈ যোৱাৰ পূৰ্বে চন্দ্ৰত এখন চহৰ স্থাপন কৰিলে ই এক ‘ট্ৰেনিং গ্রাউণ্ড’ বা আৰম্ভণি বিন্দু হিচাপে কাম কৰিব।

চন্দ্ৰত চহৰ নিৰ্মাণ কৰাটো কোনো সহজ কাম নহয়। তাত অক্সিজেনৰ অভাৱ, চন্দ্ৰৰ ধূলি আৰু মহাজাগতিক বিকিৰণৰ (Radiation) দৰে গুৰুতৰ সমস্যা আছে। তথাপিও, মাস্কৰ এই পৰিকল্পনাই মহাকাশ পৰ্যটনৰ এক নতুন দুৱাৰ মুকলি কৰিছে। তেওঁ আশাবাদী যে অনাগত দিনত পৃথিৱীৰ পৰা চন্দ্ৰলৈ যাত্ৰা কৰাটো বৰ্তমানৰ আন্তঃৰাষ্ট্ৰীয় বিমান যাত্ৰাৰ দৰেই সহজসাধ্য হৈ পৰিব।

এই পদক্ষেপে কেৱল বিজ্ঞানৰ অগ্ৰগতিকে নহয়, বৰঞ্চ ভৱিষ্যতৰ মানৱ ইতিহাসৰ এক নতুন অধ্যায়ৰ সূচনা কৰিব বুলি বিশেষজ্ঞসকলে ধাৰণা কৰিছে।