অর্থনীতিবিদৰ আশংকা, যুদ্ধ বন্ধ নহ'লে মে' মাহৰ ভিতৰত পতন ঘটিব বিশ্ব অর্থনীতিৰ

ডিজিটেল ডেস্ক: মধ্যপ্রাচ্যৰ যুদ্ধ আৰু হৰমুজ প্রণালীত চলি থকা সংকট অধিক দীঘলীয়া হ'লে বিশ্বৰ অৰ্থনীতিত গুৰুতৰ সংকটৰ সৃষ্টি হ'ব। শক্তি খণ্ডৰ বিশেষজ্ঞসকলে কয় যে খাৰুৱা তেল আৰু গেছৰ সংকটে বিশ্বৰ অৰ্থনীতিক পতনৰ মুখলৈ লৈ যাব। 

শক্তি অর্থনীতিবিদ আনছ আলহাজীয়ে কয় যে মধ্যপ্রাচ্যৰ যুদ্ধৰ অচিৰেই অন্ত নপৰিলে বিশ্বৰ অৰ্থনীতিৰ পতন ঘটা নিশ্চিত। আলহাজীয়ে এইবুলি সকীয়াই দিয়ে যে যুদ্ধ দীঘলীয়া হ'লে বিশ্বৰ অৰ্থনীতিত ইয়াৰ ভয়াৱহ প্ৰভাৱ পৰিব। তেওঁ যুদ্ধ আৰু হৰমুজ প্রণালী বন্ধ হোৱাৰ ফলত বিশ্বৰ শক্তিৰ বজাৰত সৃষ্টি হোৱা গভীৰ সংকটৰ কথা উল্লেখ কৰি কয়, 'যদি মধ্যপ্রাচ্যৰ যুদ্ধৰ শীঘ্ৰে অন্তনপৰে তেতিয়া মে' মাহৰ আৰম্ভণিতে বিশ্বৰ অৰ্থনীতিৰ পতন ঘটিব।' 

উল্লেখযোগ্য যে অৰ্থনীতিৰ পতন ঘটাৰ অৰ্থ হ'ল হঠাতে বিশ্বৰ অৰ্থনীতি গুৰুতৰ তথা ভয়াৱহ পৰিস্থিতিৰ সৃষ্টি হোৱা আৰু ইয়াৰ ফলত বিশ্বৰ উন্নয়নৰ হাৰ বৃহৎ হাৰত অৱনমিত হোৱা, শ্বেয়াৰ বজাৰত সূচকাংকৰ পতন অব্যাহত থকা, সা-সম্পত্তিৰ মূল্য বৃহৎ হাৰত হ্রাস পোৱা, ব্যৱসায়-বাণিজ্যত স্থবিৰতাৰ সৃষ্টি হ'ব। অর্থনীতিবিদজনে লগতে কয় যে বিশ্বৰ বাবে হৰমুজ প্রণালী অতি গুৰুত্বপূৰ্ণ আৰু এই সামুদ্রিক পথ বন্ধ হৈ পৰাটো সমগ্ৰ বিশ্বৰ বাবে গভীৰ উদ্বেগৰ বিষয়, কিয়নো এই পথেৰে প্ৰায় ২০% খাৰুৱা তেল পৰিবহণ কৰা হয়। সেয়েহে এই সামুদ্রিক পথ বন্ধ হৈ পৰাৰ প্ৰভাৱ বিশ্বৰ বাণিজ্যত অতি গভীৰ হ'ব। যুদ্ধ আৰু হৰমুজ প্রণালী বন্ধ হৈ পৰাৰ প্ৰভাৱ প্ৰথমে ইউৰোপত স্পষ্ট হৈ পৰিছে বুলি তেওঁ সতর্কবাণীটোত উল্লেখ কৰে।

উৎসঃ দৈনিক জনমভূমি