ডিজিটেল ডেস্কঃ জাপান এখন প্ৰযুক্তিবিদ্যাত উন্নত দেশ হ’লেও নিজৰ ঐতিহ্য আৰু পৰম্পৰাক লৈ অতি কঠোৰ। দেশখনত আজিও এনে কিছুমান নিয়ম প্ৰচলিত আছে, যিবোৰে আধুনিক বিশ্বক আচৰিত কৰি তোলে। তেনেকুই এক বিতৰ্কিত অথচ দৃঢ় পৰম্পৰা অনুসৰি, জাপানৰ সৰ্বাধিক জনপ্ৰিয় খেল ‘সুমো’ (Sumo Wrestling) ৰ মূল মঞ্চত মহিলাৰ প্ৰৱেশ আৰু উপৱেশন সম্পূৰ্ণৰূপে নিষিদ্ধ।
‘ডোহয়ো’ আৰু পবিত্ৰতাৰ ধাৰণা
জাপানৰ পৰম্পৰাগত সুমো কুস্তি যিখন বৃত্তাকাৰ মঞ্চত অনুষ্ঠিত হয়, তাক ‘ডোহয়ো’ (Dohyo) বুলি কোৱা হয়। জাপানী লোকসকলৰ বাবে এই মঞ্চ কেৱল এখন খেলপথাৰ নহয়, বৰঞ্চ এক অতি পবিত্ৰ স্থান। জাপানৰ স্থানীয় ‘শিন্টো’ ধৰ্মীয় বিশ্বাস অনুসৰি, এই মঞ্চখনত দেৱতাৰ বাস থাকে। হাজাৰ বছৰ ধৰি চলি অহা পৰম্পৰা মতে, এই মঞ্চৰ পবিত্ৰতা ৰক্ষা কৰিবলৈ মহিলাসকলক ইয়াৰ পৰা আঁতৰত ৰখা হয়।
পৰম্পৰাৰ আঁৰৰ যুক্তি
এই কঠোৰ নিয়মৰ আঁৰত মূলতঃ দুটা কাৰণ দৰ্শিত কৰা হয়:
ধৰ্মীয় বিশ্বাস: শিন্টো ধৰ্মত পবিত্ৰতা আৰু অপবিত্ৰতাৰ এক বিশেষ ধাৰণা আছে। মহিলাৰ ঋতুস্ৰাৱৰ সৈতে জড়িত তেজক পৰম্পৰাগতভাৱে ‘অশুচি’ বুলি গণ্য কৰা হৈছিল, যাৰ বাবে তেওঁলোকক এই পবিত্ৰ মঞ্চত উঠিবলৈ অনুমতি দিয়া নহয়।
সংস্কৃতিৰ সুৰক্ষা: জাপানী সুমো সংস্থাই বিশ্বাস কৰে যে এই নিয়ম সলনি কৰিলে তেওঁলোকৰ শতিকা পুৰণি সংস্কৃতিৰ মৌলিকতা নষ্ট হ’ব।
বিতৰ্ক আৰু বিশ্বজুৰি চৰ্চা
আধুনিক যুগত এই নিয়মটোক লৈ কেইবাবাৰো বিতৰ্কৰ সৃষ্টি হৈছে। এবাৰ এজন সুমো খেলুৱৈ মঞ্চৰ ভিতৰত ঢলি পৰাত এগৰাকী মহিলা নাৰ্ছে তেওঁক প্ৰথমিক চিকিৎসা দিবলৈ মঞ্চত উঠিছিল। কিন্তু তেতিয়াও আয়োজকসকলে ঘোষণা কৰিছিল যে মহিলাই মঞ্চ ত্যাগ কৰিব লাগে। এই ঘটনাই সমগ্ৰ বিশ্বতে লিংগ বৈষম্যৰ চৰ্চা আৰম্ভ কৰিছিল। আনকি জাপানৰ প্ৰভাৱশালী মহিলা ৰাজনীতিবিদসকলেও বঁটা বিতৰণৰ বাবে এই মঞ্চত উঠিবলৈ অনুমতি নাপায়।
Continue Reading
