ডিজিটেল ডেস্কঃ দেশ কঁপাই যোৱা দিল্লীৰ 'শ্ৰদ্ধা ৱাকাৰ' হত্যাকাণ্ডৰ অনুৰূপ এক জঘন্য ঘটনা এইবাৰ পোহৰলৈ আহিছে অন্ধ্ৰপ্ৰদেশৰ বিশাখাপট্টনমত।
চহৰখনৰ এল.ভি. নগৰ অঞ্চলত এগৰাকী নৌসেনা কৰ্মীয়ে নিজৰ প্ৰেমিকাক নৃশংসভাৱে হত্যা কৰি মৃতদেহ টুকুৰা-টুকুৰ কৰি ফ্ৰীজত লুকুৱাই ৰখাৰ ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে।
আৰক্ষীৰ সূত্ৰ অনুসৰি, অভিযুক্ত ৩৫ বছৰীয়া চিন্তাড়া ৰবীন্দ্ৰ ভাৰতীয় নৌসেনাৰ এজন টেকনিচিয়ান। তেওঁৰ সৈতে ২৯ বছৰীয়া মনিকা নামৰ এগৰাকী যুৱতীৰ দীৰ্ঘদিনীয়া প্ৰেমৰ সম্পৰ্ক আছিল। দেওবাৰে ৰবীন্দ্ৰৰ পত্নী ঘৰত নথকাৰ সুযোগ গ্ৰহণ কৰি তেওঁ মনিকাক নিজৰ ফ্লেটলৈ মাতি আনে। তাত কোনো বিষয় লৈ দুয়োৰে মাজত তীব্ৰ বাক-বিতণ্ডা হয় আৰু খঙৰ ভমকত ৰবীন্দ্ৰই এখন চোকা কটাৰীৰে মনিকাক হত্যা কৰে।
হত্যাকাণ্ডৰ পিছত ধৰা পৰাৰ ভয়ত ৰবীন্দ্ৰই অত্যন্ত নৃশংস পদ্ধতিৰে প্ৰমাণ নোহোৱা কৰাৰ চেষ্টা চলায় । তেওঁ মনিকাৰ মৃতদেহটো কেইবাটাও টুকুৰা কৰি পেলায়। মৃতদেহৰ কিছু অংশ তেওঁ ফ্লেটৰ ফ্ৰীজৰ ভিতৰত লুকুৱাই ৰাখে। মৃতদেহৰ মগজু আৰু যুৱতীগৰাকীৰ মোবাইল ফোনটো তেওঁ চহৰৰ বাহিৰৰ ধাৰাপালেম নামৰ এটা নিৰ্জন ঠাইত নি জ্বলাই দিয়ে।
ফ্লেটটোৰ পৰা তেজৰ চেকা নোহোৱা কৰিবলৈ তেওঁ সমগ্ৰ ঘৰটো পৰিষ্কাৰ কৰাৰ লগতে দুৰ্গন্ধ ৰোধ কৰিবলৈ প্ৰচুৰ পৰিমাণে 'ৰুম ফ্ৰেছনাৰ' ব্যৱহাৰ কৰে।
আৰক্ষীৰ জেৰাত অভিযুক্ত ৰবীন্দ্ৰই স্বীকাৰ কৰিছে যে লকডাউনৰ সময়ত এটা ডেটিং এপৰ জৰিয়তে তেওঁলোকৰ চিনাকি হৈছিল। ৰবীন্দ্ৰৰ অভিযোগ অনুসৰি, মনিকাই তেওঁক দীৰ্ঘদিন ধৰি ব্লেকমেইল কৰি আছিল। ইতিমধ্যে তেওঁ মনিকাক ৩.৫০ লাখ টকা দিছিল যদিও যুৱতীগৰাকীয়ে তেওঁৰ নৌসেনাৰ পৰিচয় পত্ৰ (ID Card) কাঢ়ি লৈ অধিক টকা দাবী কৰি আছিল, যাৰ বাবে তেওঁ চৰম মানসিক চাপত আছিল।
অপৰাধ সংঘটিত কৰাৰ পিছত ৰবীন্দ্ৰই তেওঁৰ এজন বন্ধুক ফোন কৰি সকলো কথা বিৱৰি কয়। বন্ধুজনৰ পৰামৰ্শ মৰ্মে তেওঁ গাজুৱাকা আৰক্ষী চকীত উপস্থিত হৈ আত্মসমৰ্পণ কৰে। আৰক্ষীয়ে ইতিমধ্যে ফ্লেটৰ পৰা মৃতদেহৰ অংগসমূহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে। এই ঘটনাই পুনৰবাৰ সমাজত অপৰাধীৰ বিকৃত মানসিকতাৰ ভয়ংকৰ ছবিখন প্ৰতিফলিত কৰিছে।
Continue Reading
