ডিজিটেল ডেস্কঃ শেহতীয়া গোলকীয় অস্থিৰতা আৰু পশ্চিম এছিয়াৰ যুদ্ধসদৃশ পৰিস্থিতিৰ পৰিপ্ৰেক্ষিতত প্ৰধানমন্ত্ৰী নৰেন্দ্ৰ মোদীয়ে দেশবাসীক এক গুৰুত্বপূৰ্ণ সম্বোধন আগবঢ়ায়। বিভিন্ন ছ'চিয়েল মিডিয়া প্লেটফৰ্মত বিয়পি পৰা উৰাবাতৰি আৰু অপপ্ৰচাৰৰ বিৰুদ্ধে দেশবাসীক সজাগ হ’বলৈ প্ৰধানমন্ত্ৰীয়ে আহ্বান জনাইছে।
প্ৰধানমন্ত্ৰীয়ে তেওঁৰ ভাষণত স্পষ্ট কৰি দিয়ে যে সংকটৰ সময়ত কিছুমান অসাধু চক্ৰই দেশৰ অভ্যন্তৰত বিভ্ৰান্তিৰ সৃষ্টি কৰিবলৈ চেষ্টা কৰে। বিশেষকৈ খাদ্য সামগ্ৰী, ইন্ধন আৰু নিত্য ব্যৱহাৰ্য বস্তুৰ নাটনি হ’ব বুলি যি ধৰণৰ অপপ্ৰচাৰ চলিছে, সেইবোৰ সম্পূৰ্ণৰূপে ভিত্তিহীন। তেওঁ দেশবাসীক কোনো ধৰণৰ আতংকিত ক্ৰয় নকৰিবলৈ অনুৰোধ জনায়।
প্ৰধানমন্ত্ৰীয়ে দেশবাসীক আশ্বস্ত কৰি কয় যে ভাৰত চৰকাৰে ইন্ধন আৰু খাদ্য শস্যৰ পৰ্যাপ্ত মজুত সুনিশ্চিত কৰিছে। গোলকীয় বজাৰত অপৰিশোধিত তেলৰ মূল্যৰ উঠা-নমাৰ ওপৰত চৰকাৰে তীক্ষ্ণ দৃষ্টি ৰাখিছে যাতে ইয়াৰ প্ৰভাৱ সাধাৰণ জনতাৰ ওপৰত নপৰে। কোনো ব্যক্তিয়ে যদি সংকটৰ সুযোগ লৈ সামগ্ৰীৰ ক’লা-বজাৰ বা দৰ বৃদ্ধি কৰিবলৈ চেষ্টা কৰে, তেন্তে তেওঁলোকৰ বিৰুদ্ধে কঠোৰ আইনী ব্যৱস্থা গ্ৰহণ কৰা হ’ব।
প্ৰধানমন্ত্ৰী মোদীয়ে কয়, "দেশৰ প্ৰতিজন নাগৰিক একো একোজন সৈনিক। আমি কেৱল যুদ্ধক্ষেত্ৰতে নহয়, উৰাবাতৰিৰ বিৰুদ্ধেও যুঁজ দিব লাগিব।" তেওঁ জনসাধাৰণক যিকোনো খবৰ বিশ্বাস কৰাৰ আগতে তাৰ সত্যতা চৰকাৰী মাধ্যমৰ জৰিয়তে পৰীক্ষা কৰি ল’বলৈ আহ্বান জনায়।
তেওঁ আগলৈ কয়, "আমি ধৰ্য্যশীল আৰু একগোট হৈ থাকিলে যিকোনো গোলকীয় প্ৰত্যাহ্বান নেওচিব পাৰিম। উৰাবাতৰিক প্ৰশ্ৰয় নিদি দেশৰ ঐক্য বজাই ৰখাটোৱে আমাৰ প্ৰাথমিক কৰ্তব্য।"
Continue Reading
