প্ৰমাণৰ এটা 'এটম বোমা' আছে, বিস্ফোৰিত হ'লে নিশ্চিহ্ন হ'ব নির্বাচন আয়োগ

ডিজিটেল ডেস্ক : ভাৰতৰ নিৰ্বাচন আয়োগৰ (ই চি আই) বিৰুদ্ধে প্ৰমাণৰ এটা 'এটম বোমা' উদ্ধাৰ কৰিছে কংগ্ৰেছ দলে।

লোক সভাৰ বিৰোধী দলপতি তথা কংগ্ৰেছৰ জ্যেষ্ঠ নেতা ৰাহুল গান্ধীয়ে বৃহস্পতিবাৰে এই মন্তব্য কৰে। বিহাৰত ভোটাৰ তালিকাৰ বিশেষ ব্যাপক সংশোধনীৰ বিষয়ত বিতর্ক অব্যাহত থকাৰ সময়ত ৰাহুল গান্ধীৰ এই মন্তব্যই যথেষ্ট তাৎপর্য বহন কৰিছে।

সংসদৰ বাহিৰত বৃহস্পতিবাৰে সংবাদ মাধ্যমৰ সৈতে হোৱা বাৰ্তালাপাত গান্ধীয়ে কয় যে নির্বাচন আয়োগে ব্যাপক হাৰত ভোটাৰ তালিকাৰ হেৰফেৰ কৰা কাৰ্যৰ বাবে স্বতন্ত্র প্রতিষ্ঠানটোৰ বিশ্বাসযোগ্যতা হানি হৈছে। ৰাহুলে কয়-আমি বিষয়টোৰ গভীৰলৈ গৈছোঁ, কিন্তু নির্বাচন আয়োগে আমাক সহায় নকৰে। আমি এতিয়া নির্বাচন আয়োগৰ অনিয়মৰ এটা 'এটম বোমা' উদ্ধাৰ কৰিছোঁ। যেতিয়া এই 'এটম বোমা'ৰ বিস্ফোৰণ হ'ব, তেতিয়া আপোনালোকে ভাৰতৰ নিৰ্বাচন আয়োগক দেখিবলৈ সক্ষম নহ'ব।'

ইফালে, ভাৰতৰ নির্বাচন আয়োগে ৰাহুল গান্ধীৰ এই অভিযোগক প্রত্যাখ্যান কৰি কয় যে ই চিয়ে এনে ধৰণৰ ভিত্তিহীন অভিযোগক সদায় নস্যাৎ কৰি আহিছে। ই চিয়ে কয় যে প্রায় প্রতিদিনে এনেধৰণৰ ভিত্তিহীন অভিযোগ আয়োগৰ বিৰুদ্ধে উত্থাপন কৰি ভাবুকি দি থকা হয়। ইচিয়ে সকলো নির্বাচনী বিষয়াক নিৰপেক্ষ আৰু স্বচ্ছ হিচাপত কাম কৰি যাবলৈ আহ্বান জনায়।

উৎসঃ দৈনিক জনমভূমি