ডিজিটেল ডেস্কঃ এখন বিশেষ গাড়ীয়ে এতিয়া ছ’চিয়েল মিডিয়াত বেছ চৰ্চা লাভ কৰা পৰিলক্ষিত হৈছে৷ গাড়ী খনৰ ছবি ইতিমধ্যে ছ’চিয়েল মিডিয়াত ভাইৰেলো হৈ পৰিছে৷ গাড়ী খন কোনো ৰজা-মহাৰজাই ব্যৱহাৰ কৰা গাড়ী নহয়, গাড়ী খন হৈছে বিশ্বত ত্ৰাসৰ সৃষ্টি কৰা তালিবানৰ প্ৰতিষ্ঠাপক মোল্লা ওমৰৰ গাড়ী৷
আমেৰিকাত তালিবানে সংঘটিত কৰা বিধ্বংসী ৯/১১ কাণ্ডৰ পিছতে আমেৰিকা যুক্তৰাষ্ট্ৰৰ সেনাই মোল্লা ওমৰক ধৰিবলৈ আফগানিস্তানত পিয়াপি দিছিল৷ সেই সময়তে তালিবানৰ প্ৰতিষ্ঠাপক মোল্লা ওমৰে ব্যৱহাৰ কৰা তেওঁৰ অতিকৈ মৰমৰ গাড়ীখন পূৱ আফগানিস্তানত মাটিৰ তলত পুতি থৈছিল৷
প্ৰায় দুই দশকৰো অধিক সময় ধৰি সমাধিস্থ হৈ থকা গাড়ী খন এতিয়াও সুন্দৰ অৱস্থাতে আছে৷ বগা টয়োটা কৰোলাটো গাড়ীখন আফগানিস্তানৰ জাবুল প্ৰদেশৰ এখন গাঁৱত তালিবানৰ প্ৰাক্তন নেতা আব্দুল জব্বাৰ ওমাৰিয়ে পুতি থৈছিল৷ গাড়ীখনৰ কথা হয়তো তালিবানৰে বহুতে পাহৰি পেলাইছিল৷ কিন্তু কথাষাৰ মনত আছিল গাড়ী খন পুতি থোৱা আব্দুল জব্বাৰ ওমাৰিৰ৷ কাৰণ তেওঁ নিজেই গাড়ী খন পুতি থৈছিল৷
আফগানিস্তান এতিয়া তালিবানৰ দখলত৷ সেয়ে তালিবান নেতা আব্দুল জব্বাৰ ওমাৰিয়ে গাড়ী খন পুতি থোৱা স্থানৰ পৰা খান্দি উলিয়াবলৈ নিৰ্দেশ দিছে৷ সেইমৰ্মে গাড়ী খন মাটিৰ তলৰ পৰা খান্দি উলিওৱা হৈছে৷ জাবুল প্ৰদেশৰ তথ্য আৰু সংস্কৃতি সঞ্চালক ৰহমতুল্লাহ হাম্মাদে কয় "গাড়ী খন এতিয়াও ভাল অৱস্থাত আছে, কেৱল ইয়াৰ সন্মুখভাগ অলপ ক্ষতিগ্ৰস্ত হৈছে," ।
তালিবানে গাড়ীখন ৰাজধানী কাবুলৰ ৰাষ্ট্ৰীয় সংগ্ৰহালয়ত "মহান ঐতিহাসিক স্মাৰক" হিচাপে সংৰক্ষণ কৰিব বুলি হাম্মাদে জানিবলৈ দিছে। মোল্লা ওমৰে ১৯৯৬ চনত এক ৰক্তক্ষয়ী গৃহযুদ্ধৰ পিছত কঠোৰপন্থী তালিবানৰ জন্ম দিছিল৷তালিবানে ইছলামিক আইনৰ কঠোৰ প্ৰয়োগ জনতাৰ ওপৰত জাপি দিছিল।
মোল্লা ওমৰে টয়োটা কৰোলা বাহন খনেৰে আফগানিস্তানৰ বিভিন্ন স্থান ঘূৰি-ফুৰি তালিবানক শক্তিশালী কৰি তুলিছিল৷ ২০১৩ চনত মোল্লা ওমৰৰ মৃত্যু হৈছিল যদিও তালিবানে সেই কথা কেইবা বছৰ ধৰি গোপনে ৰাখিছিল। শেহতীয়াকৈ তালিবানে আফগানিস্তানৰ নিৰ্বাচিত চৰকাৰ খনক ওফৰাই নিজৰ শাসন প্ৰৱৰ্তন কৰিছে৷
Continue Reading
